5間睇演唱會前醫肚餐廳推介 - 麥花臣篇

·4 分鐘文章

之前就介紹咗紅館同九展附近有咩好食畀大家,今次就到旺角嘅麥花臣場館,一樣等大家食飽飽儲足精力去睇show!嚟緊有舞蹈表演Dance To Infinity、Clockenflap Presents長達8小時嘅串燒現場音樂表演同本地樂隊野佬都會喺麥花臣開show~講到旺角嘅餐廳選擇真係多到眼花撩亂,所以開飯仔精選咗幾間畀大家,有特色cafe、烏冬專門店、人氣車仔麵店、平民泰國菜同千層蛋糕店!

(傳送門:紅館篇九展篇)

窮人賣咖啡 GRIND SIZE 

以「窮人賣咖啡」作主題嘅玩味風咖啡店,裝修就係典型嘅純白色配以乾花裝飾,環境闊落坐得幾舒服~食物方面推介呢個被稱為「品•三」嘅甜品,顧名思義即係一個有晒三款甜品,包括黃豆奶蓋團子、鹹蛋黃拿破崙同焙茶豆乳卷蛋,最推介鹹蛋黃拿破崙,鹹蛋嘅鹹味有助中和返吉士嘅甜膩,配埋鬆脆嘅酥皮恰到好處!鹹點方面明太子流心蛋餅都幾受歡迎,一將蛋皮切開真係有滿滿流心效果,入面係軟綿綿嘅薯仔同牛油,再帶淡淡明太子鹹香,有驚喜。餐廳仲有供應多款主食同甜品,好似自家製芝麻提拉米蘇、沙嗲牛面珠登意粉同避風塘龍蝦堡都幾值得食。

同麥花臣距離:步行約5分鐘

圖: kkkkaykayleungcharlottemuimui

石鍋烏冬專門店 石鍋堂

家庭式經營嘅烏冬小店,烏冬會用特製石鍋呈上,保證客人食到最後一啖都仲係熱辣辣,石鍋嘅熱力仲會令湯底嘅味道入哂烏冬到。湯底選擇有五款,而且每一款都足足熬咗12小時,好有誠意。黑松露香菇湯用咗牛肝菌、天使菌、上等菇乾等八種菇類同日本空運乾菌熬成。食落菇菌味香濃,味道鮮甜。山地獄辛辣湯即係泡菜辛辣湯,湯底用咗大廚自己調製嘅泡菜去熬,辣度適中,同時保留住泡菜嘅辛香味同酸味,好開胃!配料方面有厚切豚肉、安格斯牛肉同鮮活蜆等,烏冬控必去!

同麥花臣距離:步行約6分鐘

圖: 欀霜

人氣千層蛋糕 Lamlam脷

睇show前想食下甜品,呢間超人氣嘅千層蛋糕店就啱晒。本身係網店,後尾於太子開設實體地舖,最近更搬至旺角樓上舖開Cafe!千層蛋糕每日口味都可能有啲唔同,招牌抹茶流心千層蛋糕,班戟皮薄身同幼滑嘅cream層層相隔,入口有慢慢溶化嘅感覺,抹茶味濃厚帶微甘,出色!伯爵茶千層蛋糕一樣咁受歡迎,伯爵茶味好香濃,甜度恰到好處。新店仲有埋巴斯克蛋糕賣,芝士味濃郁入口幼滑,又多一個選擇~

同麥花臣距離:步行約7分鐘

圖: foodiechans

港式地道車仔麵 阿四車仔麵

喺旺角區都幾有口碑嘅車仔麵店,除咗份量夠晒大外,唔少配料都係自家製。首先滷水腩肉,滷到入晒味,肥瘦雙間清晰可見,一入口唔會覺得成口油,邪惡都要食呀!炸墨魚卷都係必試之選,香脆之餘好彈牙,仲食到粒粒墨魚,另外炸豆腐同滷大腸都做得唔錯。如果有選擇困難症,可以食$60嘅招牌麵,有齊辣魚蛋、辣魷魚、豬皮、豬大腸、雞翼尖、蘿蔔、滷水蛋、瑞士雞翼同豬紅九款餸,啱晒大胃王。

同麥花臣距離:步行約4分鐘

圖: 山區麵包王

平民泰國菜 阿來東南亞風味

一間性價比幾高嘅泰國菜,雖然裝修就較普通但食物質素幾好又抵食!好似$258二人套餐,已經包一份泰式滷豬髀或泰式海南雞、生蝦刺身、泰式肉碎生菜包、白飯或油飯兩碗同飲品兩杯,生蝦刺身新鮮彈牙,個汁都好開胃;泰式肉碎生菜包香辣惹味,仲炒得好有鑊氣添。另外泰式金邊粉都幾推薦,酸、鹹、甜味恰到好處,味道幾地道!

同麥花臣距離:步行約4分鐘

圖: lamwing411ng_thomas_98

 

文: Yanica

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能