5間韓系cafe推薦!奶油色主題、巨大化馬卡龍

天氣咁炎熱,約朋友出街又怕曬,最好就係去室內地方嘆冷氣喇~去咖啡店吖,有嘢食有嘢飲又可以慢慢坐。今期介紹5間韓系cafe畀大家,間間嘅食物都好吸引呀,睇下邊間啱你心水~

巨大化馬卡龍 JuniJib Dessert

幾個月前新開嘅韓式甜品cafe,有馬卡龍、曲奇、刨冰、特飲等,啱晒一眾甜品控。佢哋最招牌一定係超厚夾心嘅馬卡龍,比起傳統馬卡龍厚成倍,口味仲多達20款添~如人氣口味藍莓忌廉芝士,通常坊間食嘅馬卡龍都好甜,但呢度甜度適中,帶有藍莓酸味,芝士味濃郁,外層都焗得好脆呀。其他口味仲有焦糖燉蛋、士多啤梨乳酪、伯爵茶及Tiramisu都好受歡迎㗎。

圖: 餐廳官方Facebook
圖: 餐廳官方Facebook

奶油色系主題 Wuli

鍾意簡潔風嘅朋友就啱晒,呢間cafe以奶油色系為主題,真係好韓!食物方面就將韓式傳統食材混合cafe常見菜單中,如韓國style嘅All Day Breakfast,將煎香嘅午餐肉代替腸仔、韓式雞蛋卷代替太陽蛋等,邪惡都要食呀!韓式辣醬魚糕雞肉扁意粉都幾有特色,選用韓國經典辣醬加上忌廉製成醬汁,味道甜甜辣辣又creamy,令人愈食愈上癮。

圖: CookieKan6349
圖: CookieKan6349

超酥脆Croffle Milk Bar Cafe

位於深水埗兩層高嘅人氣韓式cafe!同樣走簡約風,室內係木系傢俬配綠色植物,而上層就係工業水泥風,好有誠意。必食嘅係近年好hit嘅Croffle,Croffle本身已經做到好酥脆,牛油香氣濃。口味呢就有奶油、肉桂、Lotus Bisocff及一款鹹嘅Ham & cheese,鹹鹹甜甜又幾有驚喜。飲品方面特別推薦Mint Chocolate,薄荷味唔會太搶,仲食到粒粒朱古力~

圖: ck foodiary
圖: ck foodiary

人氣盒子吐司 E FOR EGG

住大圍嘅朋友一定對呢間cafe唔陌生,以韓式盒子吐司聞名,由小店搬至大鋪後仲新增咗唔少菜式添!焦糖雞蛋布丁盒子吐司真係好啱相機食先,唔單止好睇仲好食,吐司煎到外脆內軟,配埋超滑嘅焦糖布丁,呢個組合係無得輸。鹹吐司呢,金沙軟殼蟹三文魚籽海鮮沙律盒子吐司令人驚喜,軟殼蟹大大隻仲要炸到好香脆,加埋滑蛋再配埋三文魚籽口感更豐富,一個人食晒真係會好飽肚!

圖: Konkon22
圖: Konkon22

韓式現代風cafe Ppalli Ppalli

好fashionable嘅韓式cafe,裝修以銀色及金屬材料,有種外太空主題嘅感覺,同一般韓式cafe好唔同呀。食物方面都好有特色,係fusion韓國菜,如Gimbap即係紫菜包飯,用咗蛋絲代替白飯,好啱低碳生活嘅朋友。和牛面頰酸種包都值得一試,和牛面頰肉配上泡菜,泡菜嘅酸味令到成道菜無咁膩,面頰肉都好軟嫩,外層稍微有煎過,所以食落都幾香。

圖: Li Nok Hang
圖: Li Nok Hang

文: Yanica

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能