50歲萬綺雯保養得宜 凍齡美貌網民驚嘆不已

萬綺雯（蚊蚊）喺1989年參選亞姐，獲得亞軍後加入亞視隨即備受力捧。蚊蚊多年嚟主演過唔少劇集，之後憑《我和殭屍有個約會》馬小玲及《我和春天有個約會》藍鳳萍而爆紅，成為「亞視一姐」。2012年蚊蚊轉投無綫，劇接劇嘅佢火速成為一線花旦，不過喺2016年拍完《致命復活》再冇拍劇，直至上年先久休復出，夥拍歐陽震華拍攝《伙記辦大事》。不過有指今年萬綺雯已經低調離巢，與無綫結束賓主關係。

10月18日係蚊蚊農曆50歲生日，佢就喺社交網站分享生日影片，片中佢身著白色露膊裙，手拎住紅酒話：「有人說女人最好的年紀是18歲，不對，我覺得無論是什麼年齡，當下才是最好的。女人最美的時候，不是18歲的青春，也不是30歲的成熟，而是她永遠都充滿自信的樣子。」「入五」嘅蚊蚊除咗一雙煞食嘅42吋長腿之外，佢個靚樣同身型都同樣保養得宜，完全唔似已經年過半百歲。片段一出街，即時有網民留言驚嘆佢嘅凍齡神功，仲讚佢夠自然又唔造作，紛紛留言話：「仍然是馬小玲，沒有膠化是非常難得，Happy birthday with your 十三 ！」、「我真係好鍾意睇你、勝在夠自然、不做作、永遠都咁靚，講得啱！最緊要有自信，我今年都61歲了！」、「年年都是我心中的馬小玲，你肯定還是殭屍，完全和當年的馬小玲一樣美」。

【相關搜尋】萬綺雯甄子丹分手