55歲郭可盈內地登台惹復出傳聞 否認回巢拍TVB劇 傳座擁億萬身家

TVB前花旦郭可盈近年甚少拍劇，對上一次主演嘅劇集已經係15年前嘅《富貴門》。早前郭可盈喺內地登台，以黑色低胸裙造型演唱，唔少網民都讚可盈keep得好，甚至因此傳出佢係咪有復出大計。

郭可盈尋日同老公林文龍參加活動，原來尋日仲係郭可盈55歲生日。被問到係咪有意復出時，可盈直接話「冇咁嘅意思」，登台純粹係覺得合適，而佢就一直等緊好角色好劇本同好團隊。郭可盈亦都話TVB冇搵過佢拍劇，可能因為知道佢嘅意向。

同樣好耐冇拍劇嘅林文龍就話自己好高要求，而家接戲嘅前提係享受工作，希望大家開心一齊享受做好件事。郭可盈同林文龍多年前因拍劇結緣，婚後都一齊拍過《十兄弟》演夫妻，但係被問到會唔會再以夫妻檔拍劇，文龍就話機會唔大，因為佢同郭可盈都係工作認真嘅人，免得節外生枝。

郭可盈係圈中低調富貴人家，郭父郭達昌經營塑膠廠起家，身家豐厚。有傳2011年郭達昌逝世前，曾指明要求身為二女嘅郭可盈接管家族生意，並已安排將百億資產分配俾4名仔女。而郭可盈本身係TVB花旦，收入唔錯之餘亦投資有道，據報導指可盈2005年一口氣買入4個奧運站樓盤逾千呎海景單位，加埋自住嘅西貢獨立屋，估計單係物業已經值2億，難怪唔急住復出。