6000呎日光Cafe+酒吧+文藝空間 文青咖啡館十週年新店進駐文化中心

2012年創立嘅本地咖啡品牌牧羊少年全新概念店「牧羊少年與他的浮萍」最近進駐尖沙咀文化中心,為進一步推廣本地文化,新店結合餐飲、酒吧、文藝三大概念於一身,不時舉辦展覽、工作坊等活動,同時提供更寬敞更舒適嘅用餐環境。

新店位於文化中心地下,大玻璃窗採光度高兼望到部分維港海景
新店位於文化中心地下,大玻璃窗採光度高兼望到部分維港海景

文化藝術x漂書區推動交流

文化藝術區域用作舉辦展覽及工作坊,令本地文藝同大眾有萍水相逢嘅機遇
文化藝術區域用作舉辦展覽及工作坊,令本地文藝同大眾有萍水相逢嘅機遇

牧羊少年與他的浮萍佔地約6,000平方呎,主要分為三大區域:咖啡室及餐廳、酒吧(預計9月初開業)、文化藝術場地。文藝區會同本地藝術家及工藝師合作,以推廣文化為目標,可以用作舉辦唔同嘅展覽、工作坊、研討會、播映會、音樂會、文藝市集等。各位藝術家或文化工作者如果有興趣,之後亦可以到餐廳網站預約場地,或提議合作活動。

新店依然會有漂書及「未來的信」代寄服務
新店依然會有漂書及「未來的信」代寄服務

大家一開始對牧羊少年咖啡館嘅印象可能係香港首間旅遊主題Cafe,又或者係有得漂書。新店文藝區亦繼續設置漂書架,畀大家交換書籍、鼓勵閱讀。漂書所得收益會定期撥作慈善及文化項目。旁邊嘅明信片唔單止可以買走,更可以寫完之後用「未來的信」代寄服務,由餐廳喺五年內指定時間代為寄出。

Cafe全新Menu登場

慢燒保濕三黃半雞伴燒新薯及粟米筍($228)
慢燒保濕三黃半雞伴燒新薯及粟米筍($228)

新概念店Menu亦偏向精緻西餐,開飯仔私心大推嘅係呢道慢燒三黃雞,將脂肪豐盈嘅三黃雞先浸鹽水,令雞肉更軟嫩多汁,然後風乾再生焗,得出雞皮香脆透薄、雞肉滑溜Juicy嘅豐富口感。雞肉本身已經有肉香同鹹味,亦可以加燒汁或者配菜增加變化。

龍蒿明太子忌廉大蝦扁意粉($138)
龍蒿明太子忌廉大蝦扁意粉($138)

龍蒿係一款香港較為少見嘅香草,味道甘甜,喺西餐當中經常配搭白肉同海鮮。大廚就選擇加喺明太子忌廉汁當中,唔會蓋過明太子嘅鹹香同忌廉嘅Creamy,同時令醬汁變得更清爽唔膩口。加上肉質爽口嘅大蝦,味道討好。

豐富早午餐·甜品推介

素食早午餐($128連自選飲品)
素食早午餐($128連自選飲品)

中午嚟可以選擇英式早午餐,同二/三道菜午餐。跑「素」朋友絕對要點呢份素食早午餐,有齊蜜餞日本南瓜、牛油果、藍莓Granola希臘乳酪、意大利黃瓜、澳洲西蘭花苗、焦糖扒茄、燒雜菌、無花果核桃酸種多士。當中蜜餞日本南瓜係加咗蜜糖再烤,味道加倍香甜。

伯爵茶焦糖燉蛋($68)
伯爵茶焦糖燉蛋($68)

食Lunch可以加點小食同甜品,包括伯爵茶焦糖燉蛋。製作蛋漿嘅時候加入伯爵茶葉,食落茶香馥郁嘅秘訣係要花時間以低溫充分悶焗出茶香。加上燉蛋焦糖脆面香甜帶焦香,甜而不膩。大廚建議加埋金寶落去一齊食,口感更豐富。

酒吧必點冷·熱Tapas

酒吧預計9月初開業,設有舞台,可以舉辦音樂會或棟篤笑等活動
酒吧預計9月初開業,設有舞台,可以舉辦音樂會或棟篤笑等活動
伊比利豬背油薯條($68,午市套餐+$48)
伊比利豬背油薯條($68,午市套餐+$48)

Happy Hour除咗必需酒,當然唔少得送酒小食啦,餐廳亦推出一系列Tapas。比較特別嘅有呢份伊比利豬背油薯條,顧名思義炸薯條嘅時候加咗伊比利豬背油,難怪一送上枱就聞到濃郁豬油香氣!薯條偏幼身,外脆內棉,加埋蒜蓉同少少鹽,趁熱食好快就清晒。

盆鹽橙肉薄切日本北海道帶子($118)
盆鹽橙肉薄切日本北海道帶子($118)

盆鹽係釀曬豉油時喺缸底結晶而成嘅鹽,比一般嘅海鹽多一分豉油嘅發酵風味。廚師就以盆鹽為北海道帶子提鮮,再配搭三文魚子、橙肉,同檸檬皮。開飯仔就覺得盆鹽可以少啲啲,而家略嫌蓋過帶子甜味。

新出創意咖啡·冷壓果汁

菠蘿迷迭香清茶咖啡($58,午市套餐+$36)
菠蘿迷迭香清茶咖啡($58,午市套餐+$36)

飲品方面亦有新嘢,例如呢杯好啱香港夏天飲嘅菠蘿迷迭香清茶咖啡,先以菠蘿、迷迭香打成基底,再倒入四季青茶、Espresso,最後以檸檬乾及迷迭香點綴。影完相記得攪勻再飲,聞落係迷迭香嘅芬芳,入口就係咖啡嘅醇香同菠蘿嘅酸甜交織,茶香唔太突出,整體清爽醒神。

(上)瑪琪雅朵($34,午市跟餐免費),(下)牛奶咖啡,($44,午市套餐+$18)
(上)瑪琪雅朵($34,午市跟餐免費),(下)牛奶咖啡,($44,午市套餐+$18)

咖啡試業期間選用印尼單品豆,預計之後將會轉為本地炒豆嘅埃塞俄比亞同巴西拼配豆,取其前者嘅花果香同後者嘅甜味同Body。另一特色係呢度係坊間少見瑪琪雅朵都會有拉花!

(左)冷壓蘋果甘筍香橙($62,午市套餐+$36),(右)抹茶牛奶($46,午市套餐+$18)
(左)冷壓蘋果甘筍香橙($62,午市套餐+$36),(右)抹茶牛奶($46,午市套餐+$18)

想健康啲呢度亦有冷壓果汁,圖中呢杯橙色嘅就落咗蘋果、甘筍同橙,甜甜哋唔會有有草青味。另有葡萄西柚蜂蜜、青蘋果西芹蜂蜜、奇異果青瓜羽衣甘藍蜂蜜選擇。抹茶牛奶分層亦好啱打卡,口感柔滑,茶香有回甘。

餐廳外係文化中心嘅水池,加上水泥中島座位同植物擺設,呼應店名「浮萍」
餐廳外係文化中心嘅水池,加上水泥中島座位同植物擺設,呼應店名「浮萍」
餐廳將於9月24日正式開張,屆時將會舉辦特別活動
餐廳將於9月24日正式開張,屆時將會舉辦特別活動

牧羊少年與他的浮萍

地址:尖沙咀梳士巴利道10號香港文化中心地下

文:Cathy.H

相:Sunny