67歲魯振順承認離開TVB 早前向高層反映被Cut Show致收入少過洗碗工

近年唔少TVB綠葉約滿離巢，最近又多一個，就係早前向TVB行政主席許濤激動陳情嘅資深演員魯振順。

有報導指，67歲嘅魯振順已經被飛出TVB官網嘅藝人欄目，估計魯係咪已經約滿走人。有傳媒向當事人求證，魯振順就承認已經離巢。魯振順表示已經返TVB計好強積金，形容心情好平淡，冇覺得可惜。早前魯振順獲薛家燕嘅教育中心聘任為導師，另外又會北上登台，生計唔成問題。魯振順一度考慮返內地居住，但考慮到曝光率現時仍在部署。魯振順亦希望日後可以拍短劇同做直播，佢更透露內地開一次直播嘅收入，隨時可以係TVB兩至三年嘅人工。

魯振順七十年代末考入TVB藝訓班，畢業後順理成章加入TVB，八十年代初一度獲唔少演出機會，甚至原本被安排同周潤發主演劇集《北斗雙雄》，但後來TVB改捧梁朝偉而被易角。後來魯振順首度離開TVB，試過拍電影但結果搞到欠下巨債，好在得到監製劉家豪同梅小青引薦入亞視先翻身。魯振順90年代末重返TVB，喺呂頌賢主演版本《笑傲江湖》演東方不敗一角深入民心，連原作者金庸都大讚。近期TVB宣布三度重拍《笑》，網民都話東方不敗一定要搵返魯振順做。

TVB主席許濤4月時與近百名藝員見面，魯振順趁機會無所畏懼地講足10分鐘，訴說公司不時Cut Show導致收入大減，直言「洗碗都比我賺得多」。惟TVB總經理曾志偉其後卻以「唔係特別嘅新聞」、「冇一個藝人可以做到老」作回應，稱電視台政策向來如此。

演過唔少陰柔角色嘅魯振順，不時被觀眾以為佢係同志，不過佢早前喺專訪自爆「大把人懷疑我，阿媽都懷疑過我啦，唔通我逐個解釋？我講畀你聽，我第一個女人老過我，佢大我七年。嗰時佢肥咗，瞞住我走咗去深圳墮胎。當時我好戇居又笨，如果佢留返個BB仔，我個仔今年40歲喇」。魯振順同多年前參加歌唱比賽認識嘅Julie 2019年重遇，後來火速發展戀情，曾計劃2022年結婚，但最後因疫情等因素取消結婚，不過二人仍在交往。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！