69歲李楓入住老人院近一年 三餐溫飽感謝上天眷顧

李楓
李楓

近日有網民喺連登討論區出PO尋找一名TVB甘草女演員,網民形容呢位女演員係「把聲成隻鴨咁壓住晒,有粒大粒墨喺嘴角」、「做開啲野蠻角色,即係文初古裝劇會出現嘅野蠻奶奶或者宮女阿頭,成日都紮住馬尾或者用個髮簪叉個髻出嚟,重點係同曼珠沙華好似係好好朋友」,並附上一張超簡單嘅手繪圖。結果喺出PO四分鐘就已經有網民搵到,原來樓主要搵嘅就係李楓。另外,更有網民指:「同我老豆同一間老人院,仲好精神,行得走得,一入門口就見到佢。」

現年69歲嘅李楓(原名李惠歡),喺1975年原本係銀行工作嘅佢,誤打誤撞報讀TVB藝員訓練班,加入娛樂圈後向影壇發展,及偶爾參與話劇及舞台劇演出。李楓喺年輕時下嫁從事製衣生意嘅老公,並育有一子一女,不過可惜老公曾因生意失敗及沉迷炒股兩度破產,導致佢要賣掉嫁妝及珠寶為夫還債,甚至全家由九肚山搬到村屋居住。

直至1995年,李楓決定同老公離婚並重返TVB,為咗養活一對仔女,佢試過每日只係花費20蚊,不過回巢嘅佢得不到TVB重用,被投閒置散後轉投亞視,直至2004年重返TVB拍劇。2007年佢喺舞台劇《鄧碧雲夜遊古蹟》,扮演粵劇名伶鄧碧雲,大受歡迎。之後,佢喺2012年轉投香港電視,不過後來因香港電視未獲發牌,喺2015年再次重返TVB,多年嚟佢喺劇集都係飾演尖酸刻薄及野蠻角色居多,去到2020年便約滿離巢。

日前李楓接受傳媒訪問,期間承認已入住老人院近一年,覺得環境唔錯,仲話好好彩分配到獨立房間。佢仲話好感謝上天眷顧,現時有三餐溫飽,同時佢亦唔覺得晚景淒涼。另外,佢仲指自己年紀大,有政府資助入住老人院,仔仔亦有分擔部份費用。被問到身體情況,佢就話現時OK,而最艱難嘅時刻已經過去,佢希望自己唔好太長命,不過生命無常,唔輪到自己決定。

網民喺討論區出PO尋人
網民喺討論區出PO尋人
《巴不得爸爸...》劇照
《巴不得爸爸...》劇照
《愛·回家之開心速遞》截圖
《愛·回家之開心速遞》截圖
《情迷黑森林》劇照
《情迷黑森林》劇照
網絡圖片
網絡圖片

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!