7日斷食營,比身心靈真正抖一抖

一開始心動想去斷食營係為左減肥,係網上見到有報導話7日減左12磅毒素,低頭望一望腰間肥美嘅肚腩,終於決定心動不如行動。

成功候補入選,拎到入營通知先發現原來入營7日,要戒掉的不止是食物,仲有手機同網絡,入營第一件事就係沒收電話同電腦。7日斷食之旅,基本上係一個完全同外界斷絕來往嘅靈修之行。

斷食過程:

成個斷食營分開兩部份,頭4日係斷食,第5日開始會慢慢復食,由流質食物例如果汁、南瓜湯等開始,一路到第7日離營前嘅素食大餐為結束。

因為無左食物,水係成個斷食過程中就變得好重要。以前係網上見到有人取笑長期帶住支大水出街嘅係毒男,入營後先發現飲唔夠水嘅都市人先容易變成毒男毒女。7日斷食過程跟足老師指示每日夜晚7點前飲3000cc清水,7日之後明顯睇到皮膚好左好多。

為左幫助排出毒素,每朝起身做完早操、瑜伽同靜坐之後,大家就要鼓起勇氣飲營地負責人蘇媽媽為我地預備嘅檸檬鹽水。斷食第一日,第一啖飲落去嘅時候覺得有少少似雜菜湯幾好味,但當飲到第2000cc時,只要聽到檸檬鹽水4個字,就已經條件反射地好想嘔。因為我平時胃唔太好容易有胃酸,每朝飲檸檬鹽水成為成個旅程最辛苦嘅事,但同部份學員一樣,就算飲到嘔大家都會好堅持。因為飲完2000cc檸檬鹽水 + 1000cc清水之後嘅排毒效果真係好好。當你不斷將宿便排清,見到磅數輕左,肚腩細左,身體輕盈左之後,真係有形容唔到嘅精神爽利之感。

雖然無網絡,但蘇老師每日除左會教我地做瑜伽去調節身體嘅筋骨外,亦預備左好多關於健康養生嘅課程比我地,加上郊遊、夜行、蒸氣浴、泥敷、表演晚會等等活動,基本上呢7日除左唔覺餓之外,就唔會覺得悶,朝早曬住陽光,望住山景睇書成為我落山之後最懷念嘅美好時光。

斷食成效:

斷食7日,我一共排左9磅毒素,腰身成功回復24寸。最大得著唔止瘦左,而係明顯感受到身體好左。平時一失眠就食半粒安眠藥嘅習慣終於係呢個營戒左,出營之後堅持訓之前兩個鐘熄電話,而家可以一覺訓天光,連帶平時常見嘅頭痛眼乾都無左。最開心嘅離營後第一日順暢地黎左月經,試過經痛嘅女性會明白經痛無左係一件幾值得感恩嘅事。比起平時放假去旅行吃喝玩樂,今次真正覺得自己有休息左,起碼30年黎第一次比自己嘅腸胃放左個大假。

我們拼命囤積的比我們真正需要的多出太多,呢個係經歷完7日斷食營後最大嘅感悟。

老師說得對,比起斷食更難的是復食。當你恢複選擇權,如何把握分寸見飽就停係一門學問,因為過去嘅經驗一直教我地「食得是褔」,「唔好浪費食物」,尤其逢時過節同屋企人食飯,食飽食滯是常事,直到斷食四日,身體依然源源不絕地排出大量毒素時,我才驚覺自己平時食得有幾過量。

斷食排空後嘅感覺就好似幫身體大掃除完咁,會覺得成個人爽哂,亦因為呢份清爽,你會更注重之後嘅飲食,會想一直令身體keep住呢份輕盈感。7日斷食,斷掉的不止是食物,更多的是壞習慣和我們累積過量的欲念。

純粹思考題:到底人應該定時定候按照早午晚3餐去食飯,定係應該按照自己身體需要,真正覺得肚餓先去食嘢?

TEXT / Diana CHIU

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能