8號風球圓規襲港︳打風必share好笑片 子華「打邊爐」金句 小學生想「聽日十號風球」

8號風球圓規襲港︳打風必share好笑片 子華「打邊爐」金句 小學生想「聽日十號風球」

今日多得圓規,打工仔有個打風假。補完眠煲完劇仲有大把時間hea,不妨應吓景睇睇呢啲同打風有關嘅好笑短片-

黃子華打風金句︰人打風你打風你打嗰幾粒鐘

一有消息第朝會掛8號,一定有人約打牌,亦都因為呢條片令大家好有戒心。子華神2006年《兒童不宜》talk show入面講到打工仔期待打風唔使返工,仲約人打通宵牌,點知朝早6點改掛3號,冇得瞓仲要返工真係人都癲!「人又打風你又打風,你打得嗰幾粒鐘?我打邊爐都打得耐過你!」呢句金句就係出自呢個show。

女途人被回收箱撞到正

唔少市民認為早前吹襲嘅「獅子山」風勢唔強,反觀2006年就有個襲港颱風「派比安」,普遍錄得風力比以往嘅八號風球更高,甚至造成大約700宗塌樹報告,不過當時天文台最盡都係掛3號。

派比安有幾勁?當年TVB就拍到有女途人喺而家嘅打卡熱點天星碼頭廣告牌附近,被強風吹郁嘅回收箱撞親。

預咗要返工 打工仔講真嘢

個個都想打風有假放,唔通次次都會打風有假放咩?2015年「蓮花」襲港前夕,TVB新聞街訪市民,呢位靚仔打定輸數第二日要返工,佢話「我諗6點前都會落波,(會唔會奢望有得放多日?)唔需要奢望,因為肯定唔會」。世事都俾佢看透了。

小學雞唔想返學 寧願有龍捲風

唔止打工仔想有假放,小學生都係咁諗!有次打風前夕,有一班小學生對住鏡頭呻有11樣功課要做,所以希望打8號風球,甚至「聽日十號風球、雷暴警告、黑色暴雨警告加龍捲風!」。啋!

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!