「818多過100萬人我819維園裸跑一圈」 連登仔竟然找數 千人圍觀
連登仔向來鍾意輸賭，呢期就有巴打話
「818多過100萬人我819喺維園裸跑一圈」。
結果……170萬人出咗嚟。
咁當然都有唔少連登仔願賭唔服輸，走數時有發生。
又估唔到呢位巴打真係找數。
尋晚，樓主真係開post公布，自己深夜時份會去到維園足球場準備找數。
更神奇嘅係，現場有幾百人等食花生！
樓主搵白色袋笠頭現身，唔少人仲大叫「立即除褲 後果自負」口號，
亦有人用觀星筆照射樓主，佢應該冇受傷。
樓主先旨聲明唔好拍片影相，不過有巴打就開咗個直播，
雖然為咗保護樓主冇打燈，畫面黑麻麻，
但係最高峰有5萬人睇！
但係到戲肉，好多人用遮包圍樓主等佢除衫，
不過樓主就拎住塊牌，跑咗冇耐就縮返入遮陣，更有人話見到樓主著底褲上陣！
最終找數行動擾攘下不了了之。
咁至少樓主都現過身回應下網友訴求嘅……