雅虎香港新聞 90 後鍾情烈火戰車：如坐時光機回到舊時香港
【Yahoo 新聞電單車系列報道】有一種車，叫烈火戰車。此款車泛指在90年代港產片《天若有情》和《烈火戰車》出現的電單車型號，與放浪不羈的角色「華dee」連成一體，深入民心。《烈火戰車》公映之時，90後車手魚波還是一歲嬰兒。他鍾情此「神壇級」車款，不完全因為電影，而是因為香港。駕著它奔馳，如坐上時光機，回到舊時美好的香港，「部車年紀大過我，佢發生過唔同嘅故事、見證呢個世代嘅變遷……我擁有咗佢，就等於我感受到當年係點。」
文字記者：周詠雯
攝影記者：Davies
魚波，電單車界YouTuber，一年多前購入夢寐以求的烈火戰車，「一直都想買，呢一部係絕對嘅經典車、無可否認神壇級嘅車」。為了購得心頭好，他找過明盤暗盤、「friend搭friend」打聽，最後選購了一部「精精神神」、不用大翻新的「Honda NSR250r MC21」，也是公認的「烈火戰車」車款。
「可怕的死亡機器」
記者問魚波，坐上烈火戰車的感覺如何？魚波笑說「真係要坐咗上去先會明」。回想取車之日，就是他第一次坐上屬於自己的烈火戰車，「仲搵埋兩個friend一齊陪我攞車」，卻是蝦碌的回憶。該款車使用乾式離合器，難於控制，他首次駕駛就相當緊張，由元朗駕車到青衣途中「無限死火」，既「唔識起步」，又「唔敢揸快」。他更笑言這輛車像「可怕的死亡機器」，但又不斷強調並非貶義，「好玩但力量好癲、好難去操控」。
駕著烈火戰車出行，總會吸引不少目光，成為打開話匣子的橋樑，常有「叔叔輩」因此車與魚波搭訕：「嘩呢部車我廿年前都有揸喎！」為何這麼年輕也鍾情烈火戰車？魚波坦言並非全因電影，「電影係個hint，令人深究落去」。
這部烈火戰車比他還要老，坐上這時代產物如乘坐時光機，「如果我坐上去嘅話，會唔會感受到以前嘅嘢呢？聽長輩成日講舊時代嘅香港有幾美好，音樂啦、點樣搵食啦、獅子山下精神啦，嗰時就係充滿機遇同發展」，再與現時的香港比較，「大家就會搵啲美好嘅嘢去填補自己個內心」，而烈火戰車就帶領魚波回到那個時代，尋找內心缺失的那個部份。
「一件嘢值唔值係要問你自己」
魚波指當年的電單車特性追求速度、美感、「襟揸」、造工用料靚，「架車三十幾年都仲用得」，反觀新車款很多時候講求低造價減省成本、加上現代規例的制肘，「坐上去就感受到，原來同而家嘅嘢係有分別」。他對這部烈火戰車的愛與日俱增，「只要有能力keep到就會keep落去」。大灑金錢買這部車值得嗎？魚波就以《烈火戰車》的電影對白回應：「一件嘢值唔值係要問你自己，你問人哋係衡量唔到」。對想「入坑」的人士有何意見？魚波笑著回答：「買吖！你真係要經歷過，你先知佢係乜嘢」。
【Yahoo 新聞電單車系列報道・逢星期二、四推出】
