903籃球賽｜22歲譚旻萱又靚又識打籃球 竟然曾因生得太高冇人追？

《903 AllStar 籃球賽》相隔多年喺日前再度展開，九零三人隊同歌星勇士隊喺球場上激戰一番，除咗MIRROR及ERROR等人被追捧之外，女將譚旻萱（Mandy）同樣成為吸引網民關注。

日前，譚旻萱亦有喺IG發表感言：「係琴日嘅球場上面 有唔識打波同識打波嘅人 但係個重點就係！ 大家都依然咁認真咁投入成個比賽 睇住兩隊無論邊個入波我都覺得好型 係個場側邊嗌到聲沙力竭 最後仲同 @gigiicheung @sabrinasa 睇到眼濕濕 我相信呢個就係籃球嘅吸引之處 我亦相信大家都感受到琴日嘅個份熱血 以前中學打波嘅時候好鍾意用呢四個字 「搏盡無悔」 係琴日我再次感受到呢四個字嘅力量 多謝 @cr881903 同所有球員特別係歌星勇士隊俾我享受左一場咁熱血嘅籃球比賽」

啱啱踏入22歲嘅譚旻萱，擁有隔代混血血統，五官輪廓突出，故此中五時已被模特兒公司睇中，中學畢業後成為Angelababy和熊黛林師妹，及後拍過寶礦力、雪條廣告等，仲擔任過Edan兩首歌曲嘅MV女主角，包括《E先生連環不幸事件》及《一表人才》因而人氣急升，更被「爵屎」認證為E女郎。佢亦喺早前播放完畢嘅《季前賽》中成為「美少女街場隊」一員，佢哋與「痴漢籃球隊」比賽，原先被阿孝（姜濤飾）和阿德（呂爵安飾）等人睇唔起，最後「痴漢籃球隊」被打到落花流水。

譚旻萱曾表示自己係易肥體質，中學時被同學嘲笑話佢似「坦克」；而原來身高1米77嘅佢中三就開始打籃球，曾經係籃球隊活躍成員。Mandy曾經講過讀書嘅時候冇人追，原因係佢生得太高，雖然佢唔介意男朋友矮過自己，不過佢身邊好多朋友都話介意女朋友高過自己。Mandy認為搵男朋友最緊要係講感覺，即使對方好靚仔到冇用。至於佢現時嘅感情狀況，佢似乎已經有男友，因為曾經有網民問佢呢個高度會唔會好難識男朋友，佢就回答話唔會，因為現任係高過佢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！