AK情緒受困拒求醫 Lokman陪隊友度難關:呢世都有疤痕

MIRROR隊長Lokman(左起)首現身,偕隊友AK、Alton、Tiger宣傳新劇。
MIRROR隊長Lokman(左起)首現身,偕隊友AK、Alton、Tiger宣傳新劇。

人氣男團MIRROR演唱會墮屏慘劇發生3個多月,一眾成員正努力走出陰霾,情緒受困而消瘦的Anson Kong(AK)昨日表示正學習與傷痛共存;而「復團」後首度現身的隊長Lokman,坦言隊員們所承受的心理創傷,相信有生之年也未必能康復。

MIRROR成員AK、Lokman、Alton與Tiger昨日宣傳ViuTV新劇《繩角》,今次是隊長Lokman與Alton於MIRROR「復團」後首度亮相,Lokman透露心情已平復些少,認為是適當時候重新出發;Alton則表示要循序漸進慢慢適應。

Lokman透露休團期間有跟隊員溝通及見面:「困擾一定有,自己就好啲,會諗多少少,冇放落去個情緖度,有時設身處地去諗,自己都想靜一靜,覺得攬一攬、拍一拍膊頭已經好足夠。」副隊長AK指大家會在群組傾訴,但大家的關心均點到即止,以免勾起隊員的不開心回憶;Alton亦坦言為免關心的同時會製造麻煩,故不敢問候太多。

學習與傷痛共存

提到AK及Tiger仍情緒低落,Lokman表示會主動與他們閒聊,直言自己亦未完全康復:「比起前2個月好好多,對於我哋在場嚟講係大事,應該呢世人都未必會復原,多多少少都會有疤痕。」AK亦坦言正學習與傷痛及經歷共存,受困擾而消瘦的他自言身體不錯:「塊面瘦咗都係好事。(有冇接受張敬軒提供嘅心理輔導?)公司都有安排,但我冇諗呢個方向,覺得睇咗醫生就好似有病,會搵Lokman陪吓我。」Lokman即笑指近日拍攝新劇《打天下2》導致腰、腳齊齊痛,身體上也需要醫生。

同場的林愷鈴劇中與AK演情侶,問可有親熱戲?她大賣關子:「留畀大家到時睇啦!(擔心AK Fans呷醋?)唔擔心,佢啲Fans好有禮貌,又錫偶像,冇諗鍾意或者討厭我。」蘇麗珊則自爆角色零感情線,還相當冷血,但不擔心乞人憎。

林愷鈴(左)劇中演AK女友,而蘇麗珊則冇着落。
林愷鈴(左)劇中演AK女友,而蘇麗珊則冇着落。