雅虎香港新聞 AL冧莊奪Chill Club男金 姜濤屈居第二 台上逐一發表對11位鏡仔感受超搶鏡（附感言全內容）
ViuTV 音樂頒獎禮《CHILL CLUB 推介榜 年度推介 22/23》今（7 日）晚 7 時將在亞博舉行，其中「年度男歌手獎」共有 245993人投票，最終金獎由 Anson Lo 連續第二年奪得，共有 160826 票，即佔逾65% 選票。年度男歌手銀獎及銅獎分別均由MIRROR成員姜濤及Ian 陳卓賢奪得。
《CHILL CLUB 推介榜 年度推介 22/23》及《中年好聲音紅白大戰》相關報道：
姜濤發表感言時，特別向MIRROR 每一個成員致謝。以下是MIRROR向每一個成員訴心聲的節錄：
Lokman：我記得頭幾年我哋有好多好多嘅內部有好多問題，睇《調教你MIRROR》會知道，但係我知道經過《調教你MIRROR》，你有努力成為一個好嘅隊長。我好Respect你，多謝！
Tiger：雖然《調教你MIRROR》話同你講會有每日 50 句，但都係一句都冇，但係你好有 talent，喺電影方面、唱歌方面其實你都有你嘅talent，所以繼續加油！
Jeremy：你係我最surprise嘅一個人，老實講我喺《全民造星》並無太多留意你，但係我想講，講真，你係我覺得喺我哋咁多成員之中，真係進步最多嘅一位。
Alton：我每一次搵你都係傾啲無聊嘢，但係我知道你一直好渴求有表現自己嘅機會，我相信你總有一日一定會做到
Frankie：其實我同 Tiger 起碼有一句，但係我同你一句都冇哈哈，但係我知道你仲好努力搵緊自己嘅目標，我相信你比《調教你MIRROR》更加清楚自己嘅目標。
Anson Kong：雖然脾氣都係照舊啦，但係我知道你好努力她努力成為我地副隊長，所以好尊重你
Ian：I love you，我 proud of 你值得擁有嘅一切，你攞獎我好開心。
Stanley：我知道你好想成為一個演員，我知道你對演戲嘅熱誠，比起在場每一位都更加更加多，所以你一定會成為一個好演員。
Jer：我知你好想做到自己嘅音樂路，我知道你一直以來對於自己音樂好有堅持，繼續堅持落去。
Edan：你實在係一個非常非常全盤努力既人，我只可以講，MIRROR 入面我第二佩服你。
Anson Lo：第一個 （佩服）Anson Lo。我知道外界成日都會將我哋攞來去比較，我知道我哋好多支持者，有時會因為我哋有好多嘅爭拗，但係我想講我從來無理呢啲嘢，我想講我真心地喺《全民造星》第一日開始，我哋經歷過好多好多誤會，但係我永遠都係最信你，你知嘅，所以 I love you。
金獎得主 Anson Lo 上台發言時一度哽咽，稱感謝每一位陪伴他的觀眾與粉絲，透露自己很多個晚上感到很大壓力，很怕自己會令大家失望，「有你哋繼續陪住我，我覺得好幸福。」
Anson Lo 亦特別向父母致謝，稱近期較少在家中吃飯，感謝父母十分體諒，「而家應該係令到你哋好自豪，好多謝你哋。」他亦特別感謝 MIRROR 每一位成員，亦提到姜濤剛剛稱外界粉絲的比較，他稱「冇辦法去stop任何嘢，但係我知道呢樣嘢永遠都一定會存在，而無嘢可以阻擋我哋 12 個一齊嘅力量。」
