《愛·回家》回顧：搶眼角色逐個捉

《愛·回家》終於去到尾聲，都係時候做吓回顧。套劇播咗幾年，參演過演員真係多到數都數唔晒。論到最搶鏡，當然有神之馬壯份啦，不過其實有幾位配角嘅搶鏡程度有時比起主角真係有過之而無不及。

1. 曹總（劉一飛飾）
要數，曹總一定係最搶鏡嗰個！左一句「阿壯哇」，右一句「禾bb」相信有觀眾都一定好有印象，見字都諗起曹總把聲。好多網友都話曹總扮起土豪真係入型入格。雖然曹總嘅外貌成個土豪咁，平時講嘢又聲大大，但原來曹總為人正義又肯幫人，對佢bb又夠痴情，好多觀眾都覺得曹總搞笑得嚟又可愛！

2. 昆哥（張國雄飾）
昆哥喺劇中係一個頂住冬菇頭嘅黑道大佬，當年查李施律師事務所嘅常客。雖然係江湖中人，但昆哥為人極有義氣，成日幫馬壯手。

3. 曾超人（蔡康年飾）
曾超人為人囂張又飄忽，冇人會知佢下一步會做咩。而且呢位離晒地嘅有錢佬對垃圾藝術品嗰種執著同著迷真係好搞笑，好鬼搶鏡。

4. 廖啟聰KC （歐瑞偉飾）
之前有一個關於《愛·回家》最討厭角色選舉，劇中算係奸角嘅KC當然榜上有名啦！KC為人尖酸刻薄、專搞小動作搞破壞，成日針對查生同馬壯佢哋，有時佢又唔知醜加唔要面，真係俾佢笑死。

5. 程志美Terry（李偉健飾）
KC旁邊好多時都會見到佢嘅頭馬Terry，劇中花名叫油面王。雖然佢同Rocky一樣嘅有「神演技」，但Terry成個角色設定有種莫名嘅喜感。Terry佢唔醒目，講野唔叻又度縮，成日做錯嘢擦錯鞋而比KC罵，呢位律師同大家心目中嘅律師完全相反。

成輯《愛回家》咁多角色，唔知邊個角色喺大家心目中先係真正嘅搶鏡王呢？話唔定無綫見佢哋咁受歡迎，喺新一輯嘅《愛回家之八時入席》又會見到佢哋嘅蹤影呢！