Angelababy用英文名被內地作家鬧爆 陶傑出手諗中文名俾網民投票

中國「知名作家」劉信達經常喺微博發表偉論，過往有唔少藝人「躺著也中槍」，包括謝霆鋒、王菲、陳小春、王寶強及楊冪等等。劉信達試過警告謝霆鋒喺3個月內必須要搞清楚同王菲嘅關係，一係就結婚、一係就分手。最新就輪到近年喺內地發展不俗嘅Angelababy（楊穎）, 劉信達喺微博鬧爆Baby身為中國人，偏偏用英文名, 「西方人對應的是東方人，而不是南方人，不要無知者無畏，不要無聊當有趣！」佢又話內地人對外國節日及洋化覺得反感，希望Baby對自己個英文名反感，建議佢用返中文名喺內地發展。

香港才子陶傑睇到都忍唔住出手幫Baby講返兩句，陶傑指Baby用英文名唔係因為祟洋，而係想鼓勵下一代學好英文，好似Maggie Q同Lisa S都有中國或亞裔血統，廣電局都無要求佢哋用中文名。而且「Angelababy」發音簡單，小學程度也叫得出口，可以證明「英文不是障礙」。另外，陶傑仲幫Baby諗咗幾個中文名俾大家投票，包括「安琪拉嬰兒」、「安琪拉貝比」同埋「安琪拉悲B」，唔知Baby鍾意邊個名多啲呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！