Anjaylia陳嘉寶爆圈中綠茶婊極品行為：突改稿令同行出醜、扮可愛打乞嗤

陳嘉寶（Anjaylia）與老公黃頌祈（Epaphras）三年抱三，婚後專注相夫教女，直至年初亮相於ViuTV劇集《IT狗》，再次被憶起演員身份。當年嘅陳嘉寶係透過「八模兵團」入行，當時任職模特兒嘅陳嘉寶見過無數「綠茶婊」，日前佢就喺節目《絲打圍爐》中，與主持楊詩敏（蝦頭）和連詩雅（Shiga）大談所見所聞，仲即席模仿「綠茶婊」行為，相當搞笑。

陳嘉寶自認無殺傷力，所以「綠茶婊」喺佢面前毫不掩飾，種種行為令陳嘉寶高呼：「好睇！」陳嘉寶分享其中一次出席大型活動經歷，指有位女神級模特兒被男工作人員搭訕，即時嗲聲回應：「好耐冇見，多謝你咁支持我呀！」並直言口渴，該名男工作人員替對方前往買飲品期間，「綠茶婊」模特兒即叫大家將手袋放喺附近空位，以防男工作人員一陣返嚟糾纏佢；點知男工作人員返嚟後，呢名「綠茶婊」隨即又變得親切無比。

陳嘉寶再爆有次與兩位模特兒一齊做訪問，模特兒A突然改稿對模特兒B表示指甲可睇出一個人係咪好企理，而佢就覺得對方腳甲修得好靚。此話一出，攝影師隨即拍攝模特兒B嘅腳趾甲，陳嘉寶一望就發現模特兒B甘本無搽指甲油，仲要係一忽忽嘅，於是詢問模特兒B，先知兩者之間有過節：「我忍唔住問模特兒B，係咪稿嚟？點解我份稿冇呢Part，模特兒B好嬲話：『佢加㗎』。」

此外，陳嘉寶表示曾經遇過一名「綠茶婊」，就連打乞嗤都會搖頭扮可愛，仲即場示範三次。節目出街當日，陳嘉寶又再喺IG分享模仿「綠茶婊」打乞嗤影片，寫道：「你有無見過人咁樣打乞嗤？ 我有！我真係有！不過唔係我本人…」仲話多謝《絲打圍爐》邀請，令佢諗返起人生食過嘅好多花生，又畀佢過咗一場戲癮。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！