Anson Lo新歌《King Kong》獲神徒支持 IG專頁呼籲支持偶像但唔好踩香港樂壇

男團MIRROR出道以嚟人氣一直居高不下，掀起香港久違嘅追星熱潮。今年除咗舉行紅館演唱會，唔少成員們亦有機會推出個人solo作品，當中包括「教主」盧瀚霆（Anson Lo）喺6月頭推出今年第二首solo派台歌《King Kong》，MV由教主親自擔任導演，更在當中大曬麒麟臂。

截至今日（5日），《King Kong》MV已錄得逾650萬點擊率，及超過1萬個留言，當中絕大部分都係大力支持教主。今日凌晨，IG專頁「拾POP廣東歌」出PO，上載一張背景滿是讚美教主嘅留言，然後寫上「支持偶像冇問題 但係唔好踩香港樂壇」嘅圖片，並留言話：「先唔評論首歌好唔好聽 係唔係主流 為咗讚自己偶像踩低香港樂壇 有冇尊重過其他歌手/音樂人？」。

此PO一出便引起迴響，網民留言反應兩極，唔少網民認同版主，例如「多謝你發聲 香港真係好多好音樂 利申 鏡粉」、「真係自high, 比個like比樓主！講人話」、「感謝你肯講出嚟 我係鏡粉有時都覺得幾無奈，有啲fans真係盲撐… 咁樣對你嘅偶像都唔會有好處。」、「Your sharing is much appreciated!! 歌手本人都應該調教下自己及自己嘅fans.」、「多謝樓主 實話實說 well said 盲撐只會令偶像形象越來越差 其實香港樂壇真係有好多認真做音樂同值得留意嘅音樂人同歌手 加油」及「講得好啱，讚自己偶像係啱，但唔應該踩樂壇，留言者都唔係音樂人，音樂嘅嘢又識幾多呢！我成日見到誇張稱讚既留言，真係睇到毛管戙。」等等。

另外，亦有網民認為版主抽水及段章取義，留言話「話自己聽主流音樂聽到悶都要俾你cap出嚟批鬥都幾好笑架喎 你00後聽咗幾多年廣東歌？覺得自己有咩資格開個page話自己樂評人然係批判其他跟你唔同想法嘅人？」、「我發現一樣好好笑嘅事，有部份人鍾意專登出po, 去鬧AL 同佢班粉絲，其實係博咩 唔通係博engagement咁無聊。要專登去copy cm 再出po,其實都幾浪費時間。」、「正常就知你出嚟抽Anson lo水喇 ,我唔知你做乜？ fans喺佢偶像首歌留言有關你事?你都幾專業播 花咁多時間cap圖」、「你段章取義，有何用意？！咁又公道咩？！你同你講所講「踩低」人嘅人，又有咩分別？？」及「其實為鬧而鬧又有咩意思？cap 晒留言出個引戰post 公審fans又用意何在？歌手本身都係好無辜，做得唔好你唔欣賞又唔代表佢冇努力盡力做！何必成日都要特登玩分化？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！