Anson Lo激動鬧醒Edan

停工兩個月的MIRROR即將陸續復工，當中Edan與Anson Lo首度合作的電影《過時．過節》定於11月上映，海報及前導預告片昨日曝光。飾演父子的影帝謝君豪與Edan，在預告中當街吵大鑊，Edan怒火難耐大叫：「佢有冇喺我嘅角度諗過？」之後獨處一室時激動咆哮，另一幕是飾演其好友的Anson Lo痛罵他：「你依家咪即係喺度逃避現實囉！」短短的幾幕戲可見Edan面對影帝亦未有怯場，演出令人驚喜。該片獲邀參加韓國釜山影展，導演曾慶宏將於下月初飛往當地與觀眾見面。