Anson Lo盧瀚霆@Mirror陳年跳舞片出土 黑色唇膏裸上身 仲意外發現ERROR阿DEE!

唔少人都知MIRROR成員Anson Lo盧瀚霆入行前係舞蹈員，之前就有人搵返陳慧琳舊MV《打字機》，一次過出土Anson Lo同另一MIRROR隊友Anson Kong（江㷸生）。

對比Kelly個MV﹐另外一條Anson Lo舊片激好多。6年前只得20歲嘅教主，同一男一女參加髮型用品品牌主辨嘅舞蹈比賽。當年Anson Lo身型瘦削好多，但係舞藝已經相當有睇頭。表演去到中後段，教主同另外2位拍檔除衫熱舞，Anson Lo身上只得幾條皮帶構成嘅「背心」，加上黑色唇膏造型，視覺感十足。

更爆嘅係，有一下Anson Lo同男拍檔激咀2秒，睇到全場尖叫！原來呢條片唔少神徒睇過，大家都好buy教主嘅演出同造型，係愛呀～

睇返比賽網頁，Anson Lo嘅隊伍當年得到「網上熱爆短片獎」，至於比賽冠軍隊伍嘅成員，原來有MIRROR兄弟男團ERROR嘅阿Dee(何啟華）。阿Dee同隊友當年仲代表香港，參加跳舞比賽亞洲區決賽！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！