Anson Lo 拎大獎「亞太區」輿論潮再現？重溫當年始末 林峯坦言「一啲開心都無」

尋晚《Chill Club年度推介頒獎禮》上，Anson Lo盧瀚霆連奪「Chill Club年度男歌手金獎」同「年度推介歌曲」2項大獎。網上唔少留言認為，「教主」喺自己地頭拎大獎，同十幾年前林峯喺TVB拎「亞太區最受歡迎男歌手」及「金曲金獎」十分相似。有人擔心咁大個獎會令年資尚淺嘅Anson Lo壓力巨大，亦有人認為近年樂壇換血，好多新晉已經夠孭飛有餘，上年林家謙都係出道2年就拎男歌手金獎，年資唔太重要。

查實當年林峯因咩事成為箭靶？佢自己點睇呢件事？

2007年正式加入樂壇嘅林峯，乘住電視劇帶來嘅入屋威力，首張專輯就令佢成為年度最高銷量新人，2009年更加舉行首個紅館演唱會。2009年度勁歌金曲頒獎典禮上，林峯出道2年就奪得「亞太區最受歡迎男歌手」，得獎當晚立即成為網上熱話，唔少人製作惡搞圖，又笑稱林峯拎嘅係「亞皆老街至太子道西區最受歡迎男歌手」。

睇返當年情況，TVB剛剛發生四大唱片公司版權風波，份屬環球嘅陳奕迅同李克勤唔出席，劉德華有工作在身缺席，成績彪炳嘅古巨基已經拎咗「最受歡迎男歌手」，林峯拎「亞太區」似乎順理成章。

得獎後半年，林峯受訪時講起「亞太區」事件，話頒獎前見到工作人員望住佢眼神怪怪，已經心知不妙，得獎時心裡只有「唔係吓話」4個字。林峯更坦言「一啲開心都無」，而且受之有愧，因為國語碟都未出過，認為呢個獎來得太早，仲將獎座收好，到自覺實至名歸先拎出嚟。

當年係TVB高層嘅陳志雲，舊年都有拍片提起呢件事，透露自己當時唔同意頒「亞太區」俾林峯，但有另一位高層一意孤行，志雲大師都話太愛護藝人反而會害佢。

唔認同還唔認同，結果林峯連奪3年「亞太區最受歡迎男歌手」，2011年度勁歌總選更獲得最高榮譽「金曲金獎」，打低嗰年好HIT嘅C AllStar《天梯》，再次引起負評，甚至連圈中人如何韻詩、陳奕迅、郭富城經理人小美都出post抽水。

不過事隔多年風向又轉，早前林峯重返樂簽約華納發布單曲，有網友盛讚當年林峯好多歌曲高質，只係俾大台夾硬捧到失民心，甚至認為林峯論資質唔輸比姜濤！

有呢個案例在前，相信只要Anson Lo用心做歌，樂迷都會睇到聽到認同嘅。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！