Backpacker情侶中環開新派台式餐廳 必食本地蝦醬x台式鹽酥雞便當

·3 分鐘文章

留喺香港都可以感受去旅行去Hostel嘅感覺!中環呢間新店由一對90後Backpacker情侶開設,擺滿旅行書同各地特色擺設,食物主打無味精新派台灣菜,好似鹽酥雞便當配大澳蝦醬,早餐店肉蛋吐司升呢變厚切版等等。可以嚟一邊嘆台式美食一邊Plan下個旅行大計呀。

Backpacker情侶中環開新派台式餐廳
Backpacker情侶中環開新派台式餐廳

旅窩店名嘅有「鍾意旅行嘅大家窩在一起」嘅意思,皆因兩位店主都係非常鍾意旅行嘅背包客。英文名Carpe diem就有活在當下嘅意思,希望將呢間小店打造成好似Hostel Lobby咁,聚集同樣鍾意旅行嘅各位,一齊開心Share旅遊見聞!

招牌豆乳鹽酥雞便當
招牌豆乳鹽酥雞便當

招牌豆乳鹽酥雞便當(Lunch Set $88)

Lunch Set以台式同台泰Fusion便當為主,套餐附前菜、主食同飲品。前菜越式小清新青瓜酸辣爽口,開胃解膩。而豆乳鹽酥雞係指參照台中鹽酥雞做法,醃肉嘅時候加入腐乳增加鹹香!雞肉之後會裹上椒鹽同炸漿炸至金黃色,外脆內滑,同炸九層塔一齊食更有台灣風味。

亮點在於另上嘅醬汁係用咗香港大澳出產嘅蝦醬調配,食落蝦味突出,同鹽酥雞好夾!而且醬汁帶少少甜味,同時增加香氣同味道層次。滷蛋有誘人溏心效果,鹹香入味。便當亦有椰菜同炒粉絲,前者係台灣便當常見,爽口清甜;後者改用韓國粉絲,口感煙韌。

招牌車打芝士肉蛋吐司
招牌車打芝士肉蛋吐司

招牌車打芝士肉蛋吐司($92)

靈感嚟自台灣早餐店嘅吐司,店主再加以改良,例如麵包用無防腐劑嘅厚切方包,口感更扎實。肉亦從薄肉片改為炸豬扒,用肉質嫩滑嘅肉眼以鹽酥方式炸熟。再配搭車打芝士、蜂蜜芥末醬同半熟蛋,增加味道同濕潤度。

焦糖脆脆香蕉忌廉糯米窩夫
焦糖脆脆香蕉忌廉糯米窩夫

焦糖脆脆香蕉忌廉糯米窩夫($138)

唔少鍾意台式甜品嘅都係煙韌控,所以店主設計嘅時候就加入糯米粉同少少木薯粉,令窩夫焗出嚟口感更煙韌!即叫即製嘅窩夫微脆軟彈,仲有少少蛋香。配搭雲呢拿雪糕、香蕉、朱古力醬,同自家製焦糖脆脆,整體味道香甜。

綜合水果鮮果茶
綜合水果鮮果茶

綜合水果鮮果茶($48,或Lunch Set+$30)

茶底係冷泡四季春,減少咖啡因同時味道亦更甘甜。配搭青檸、西柚、橙、熱情果等鮮果,味道水果酸甜為主,後韻就係四季春嘅幽香清爽,甜度適中好啱消暑。

草莓石榴Calpis梳打
草莓石榴Calpis梳打

草莓石榴Calpis梳打($52,或Lunch Set+$25)

Calpis(可爾必思)係一款日本同台灣常見嘅乳酸菌飲品,配搭士多啤梨同石榴呢兩款酸酸甜甜嘅水果,味道以乳酸味為主,酸甜平衡又帶少少氣泡口感。另外如果有需要用飲管嘅話,餐廳亦會提供可食用嘅木糖醇飲管以支持環保,呢款飲管仲有士多啤梨同檸檬口味㗎!

餐廳有Postcard畀大家免費拎走,仲特別印咗Travel Itinerary,方便大家喺餐廳睇旅遊書或者傾計時,可以Plan定下個旅遊大計

旅窩
旅窩

旅窩 
地址:中環鴨巴甸街42號地舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能