BB落地行唔肯拖手仔!齊睇媽咪有咩計

親子王國 Baby-Kingdom.com

撰文:茄莉姨姨

【親子王國分享】
歲幾兩歲人仔啱啱學識行冇耐,一放落地就狂奔,捉都捉唔切。但係外面咁多危險,家長唔拖得實一實點會安心?不過小朋友就未必咁合作喇,一齊睇吓網民集思廣益點捉實隻B喇!



破釜沈舟大法
呢一招需要天時、地利、人和先做到!只要小朋友唔肯拖手仔,家長就即刻帶佢返屋企,大家都唔好出街喇!雖然印象深刻效果顯著,但係要當日冇約到人、冇緊要事先做到。

預先演習大法
呢個其實係上一招嘅預演版。因為唔係次次都可以即刻返屋企,以防「破釜沈舟大法」次次都實行唔到而減少震攝效果,有媽咪會喺屋企附近嘅安全範圍練習,如果小朋友唔肯拖手仔,就即時抱起返屋企。等小朋友明白呢個規矩。

安全範圍大法
如果小朋友一落地就跑的話,有網民只會係安全地方放低佢。例如商場、公園等地方。一旦行近馬路或許電梯呢啲危險地帶的話,一定會直接抱起小朋友,唔會畀佢喺危險嘅地方亂跑。

狗仔繩大法
有網民就選擇有帶連住嘅背囊,畀小朋友孭住,然後將條帶收短啲。咁小朋友就會習慣貼住家長行,有朝一日冇咗背囊,都會自然行喺媽咪附近!不過最大嘅問題係,如果小朋友除咗個背囊就完全唔work架喇!

堅定不屈大法
出到街,家長就要避免小朋友遇到危險。所以無論如何,都要堅持拖實手仔先行得。如果情況唔容許折返屋企,網民建議企喺原地,表示唔拖就一步都唔會行。呢啲時候就要有啲威嚴,鎮住小朋友fing唔開自己隻手~

諗深一層,其實小朋友唔願意拖手仔,都係好事嚟架!證明佢哋唔再係一舊飯咁,開始有主見喇!不過家長就要小心啲睇實啲~

入嚟討論區一齊傾


即睇下一篇:在職媽媽好辛酸……時間冇彈性、一至日都OT,焗住做「女強人」

其他內容