經濟duck,空氣可以唔duck？

近日，曾經風靡維港的可愛黃色巨鴨Rubber duck游到了北京。不過鴨仔首度亮相就已經「水土不服」，低頭皺皮無精神，唔夠氣之餘，嘟嘴個樣勁委屈。不少參觀者大呼「山寨」，亦又有人笑稱Rubber duck怕給全聚德捉去做北京烤鴨，於是嘟嘴扮大黃雞。

其實Rubber duck水土不服並不出奇，呼吸著北京污染嚴重的空氣，帶著口罩都會頂唔順！昨天，筆者一位北京朋友專程去園博園探鴨仔，結果撞正空氣污染指數爆標，半個京城都高度污染，天空灰濛蒙，戴著口罩都覺得鼻喉刺痛，鼻敏感立即復發。眼濕濕跟無口罩的黃鴨遙遙對望，後悔出門忘記看空氣污染指數「擇日」。

雖然身在香港，但不代表我們就可以鬆口氣，皆因大氣污染物擴散範圍非常大，而且遊得快過Rubber duck。最近，有報告指出廣東仍然在擴建煤電廠，粵港兩地空氣一樣會受影響。香港雖然是「特別行政區」，但香港空氣恐怕無法獨善其身。

其實最令人激氣的還是政府「漏氣」。中國政府一直都知道空氣污染問題嚴重，從5月開始國家總理李克強就開始親自部署《大氣污染防治行動計劃》，近日計劃終於出台，其中要求珠三角到2017年PM2.5濃度下降15%，但對治理空氣的關鍵──煤炭消費總量削減，卻就輕描淡寫，沒有真正提出有約束性的煤炭減量目標，未來5年中港兩地空氣質量能否真正改善，真是一個很大的疑問。

說到底，不減煤是因為怕GDP下降，如果繼續走這種「經濟duck,環境健康唔duck」的路線，恐怕不僅Rubber duck會「謝哂皮」，連中國和香港的市民，都會因為每天呼吸污染空氣，而沒有好日子過。