雅虎香港新聞 Bossip｜空姐轉職富豪遊艇 要識摺廁紙花｜Louise
天氣炎熱，早前日日都38、39°C，友人邀約出海即𦧲飯應，船主乃是正牌金融才俊，即係當周街唱緊騰訊（700）值800港元、Sea Limited（SE）值400美元嘅時候，佢就已經清哂倉，亦因為咁佢就開遊艇，人家就坐艇！
遊艇駛到深水灣附近開餐，目睹一艘遊艇Family Day好鬼熟面口，腦袋一轉醒起「佢」喇，立即著船夫駛埋去，揮手大聲嗌：「喂，Simon Lo，Louise呀！我認得你隻艇，哈哈！」海上相遇下不其然勾起經典金融事跡。
Simon Lo是蒙古能源（276）主席魯連城，一代金融高手，見佢與家人在艇上共聚天倫、弄孫為樂，享受退休生活也。
不過蒙能實在經典，幾毫子股票炒上17、18元，不禁想起出冊無耐嘅陳振聰，當日市場傳他為泰國軍官之後是叠水之人，獲彤叔接見，在高盛私人銀行家Kenneth Kwok「誘導」下炒隻蒙古能源options，最終識風水擺陣嘅陳振聰都輸到趴街，要賣遊艇套現還債。所以富豪之間都係鬥「拋」，一個唔該睇下邊個被拋落海。不過「爛船有三斤釘」，陳振聰現時仍活躍，相約金融人士飯局。
女人與遊艇
富豪養遊艇貪有privacy亦係身份嘅象徵，記得廿年前發現新世界主席鄭家純艘遊艇命名為「Sonia」，以為有大發現，仲唔係包咗條女？
大陣象到帶同攝影記者追到去灣仔碼頭當面confront，佢皺哂八字眉頭唔答，當時鬼知佢愛女叫Sonia鄭志雯咩！與舊同事講起都係得啖笑。
不過多得過氣立法會議員吳亮星教曉「洗頭艇」一詞，令人出海時總有遐想。
近排放暑假，好多富豪的少爺仔返香港渡假，跟同學仔開住屋企艘遊艇來搞party，而海上原來有好多靚女喜歡去「釣魚」，嗱唔係講釣黃𩶘倉呀，係坐住隻遊艇在海上搭訕另一遊艇，睇吓有冇機會識下富二代咁，情況咪好似見到好多性感靚女，喺寶雲道跑步一樣。
香港係自由市場而唔係計劃經濟，最緊要去爭取，有辦你睇，記者都可以變闊太啦。不過，少爺仔的富貴娘親已向船長下達命令，不准讓外人上船「釣魚」。以防血氣方剛嘅少爺仔受唔住誘惑。
廁紙要開花
另一途徑認識富豪，可加入遊艇管理公司隊crew。疫情之下，民航機空姐冇嘢撈，有啲個樣睇得下嘅就轉行去做「遊艇服務員」，在艇上提供五星級服務，呢份工唔易做㗎，聽聞每次賓客去完洗手間，都要立即清潔才可讓下位使用。
有位富三代艘遊艇剛下水，四層高、五間房，有份服侍嘅遊艇服務員大開眼界，船主要求每次去完廁所清潔之餘，廁紙口要摺成一朵花，有份摺廁紙花嘅服務員心諗：「都係抹嗰度啫，摺朵花有乜分別呢？」富豪怪僻，有誰曉？
密切留意BossMind動向！立即CLS
Powered by Mercury
