Bossip|好「息」酒樓佬 認朱太做「契姐」|Louise

酒樓開得番做生意,班酒樓佬把口都特別響。最近聽到有位福建幫嘅酒樓佬撈得好掂,由企枱、部長做到可以穿梭於金融、地產界名人身邊,如柯清輝、張松橋、地產炒家馬亞木,佢仲認殼后朱太為「契姐」。

呢位傳奇酒樓佬,人稱「歐棠」,係優品360゚(2360)老細林子峰嘅左右手。

張松橋(左)與歐棠(右)。
張松橋(左)與歐棠(右)。

私人問股熱線

難得歐棠有柯大俠(匯豐前高層柯清輝)做佢問股熱線,以下係他們約半年前的WhatsApp對話:

歐棠:「柯生,早晨,呢排啲股票唔之(知)典(點)搞,有咩高見?

呢排愈揸愈多,我國泰君安、瑞信、瑞士寶盛,嗰兩個胡(戶)口揸咗egg(億)幾,另外嗰個差不多兩egg(億),主力都係港膠(交)所,我轟(均)價463元,阿里巴巴130元倒(到),典(點)算好呢?見個市整整下愈跌愈多,宜家跌到身(心)震震呀。有咩高見呀?柯生。」

其福建同鄉柯清輝答:「 歐生,你應該問你老友,朱太啦,佢係股票專家。你問我嘅話,我睇大環境,大環境就不利所有資產價格。

第一政局唔穩定,第二又有疫情,第三通脹又高喇。咁通脹高就引致加息,咁息加得比預期快,對所有資產價格有壓力㗎。

呢個係Macro呀,即係環球政局,宜家最擔心係美國,美國已經起咗咁多,有個大調整係必要嘅,問題係時間,所以唔應該太急進嘅。」

歐棠喜鍾意將以上跟柯清輝的對話,以及福建幫猛人合照瘋狂share,令其友人對他另眼相看。

歐棠老細林子峰可能聽咗柯大俠高見,上月沽咗大埔商場舖,一鋪袋5億半。歐棠早排亦由北角城市花園搬去陽明山莊,同佢老細做埋鄰居。地產界人話佢「溝」老細真係有一手。

地產炒家馬亞木(左)與歐棠(右)。
地產炒家馬亞木(左)與歐棠(右)。

老佛爺與小桂子

據知歐棠早年廣州來港,係戲院做畫師窮到窿,有人搵佢去酒樓做部長,連件似樣西裝都冇。但佢做酒樓部長時已經好識「冧」老細,稱酒樓老闆娘為「老佛爺」,並自認是「小桂子」。

不過,英雄莫問出處,歐棠後來去咗北角開酒樓,就認識咗地產界老行尊—亞洲地產嘅蔡志忠 ,亦透過此福建幫嘅圈子,認識咗優品360゚老細林子峰,及後全力「侍候」峰哥。

酒樓佬放數賺息

一班酒樓老細同地產炒家好鬼啱key,稻香、海港、富臨,甚至翠華班老細,鍾意飲飲食食之餘,齊齊出海打水吓麻雀,操吓牌九,以前仲過埋大海,就係因為鍾意賭番兩手,數口特別精,全部都係好「息」之徒。

以往低息環境下,酒樓佬坐擁現金,最好搵嘅原來係「放數」。最近廚房佬出身嘅「熾哥」 手風唔多順,都係靠一位酒樓老細借出3000萬周轉,通常應急錢要收一分息,介紹人又拆當中嘅一分做佣金,即30萬。

呢隻洗頭水用完頭髮會棟起,人稱「洗頭婆」嘅公司老闆娘,搞離婚嘅時候都要係市場上借救命錢㗎。就係咁,歐棠就發揮佢嘅小宇宙,以前周旋喺酒樓佬度幫佢地揾客借錢拆佣,以賺取高息。

摸頂殺入中環中心

現時歐棠全力湊住林子峰,幾年前炒觀塘工廈,老細賺到錢,分左1000萬俾佢,佢向朱太借部私人飛機,又攞500萬出嚟請埋班地產炒家,如馬亞木等人去台灣暢遊。

班地產炒家後來就一齊入市買「中環中心」,林子峰仲係附近域多利皇后街開間食肆「八公館」順便來做私竇,有份落注中環中心嘅炒家都有參下股,不過一切俱往矣,隨着中環中心「扮蟹」,班炒家亦甚少喺呢間公館聚頭喇。

許榮茂(左)與歐棠(右)。
許榮茂(左)與歐棠(右)。

Louise

密切留意BossMind動向!立即CLS

FB Instagram Youtube

Powered by Mercury