Carman慘變「拳靶」想喊

·1 分鐘文章
Carman(左)與Odilia拍住上面對是非。
Carman(左)與Odilia拍住上面對是非。

女子組合Bingo成員Carman與Odilia昨日出席活動,對於加盟邵氏後被網民鬧爆「倒戈相向」,Carman直言唔開心,覺得努力被抹殺:「係公司決定,想我喺演員方面發展,我亦尊重同明白。我覺得分開(台)咁睇唔係咁好,點解我喺《全民造星III》做得好,你哋會支持,但當我去到另一個台,你哋會覺得我好差?依家個處境係做咩都畀人話。」此外,她近日積極為無綫的拳擊節目備戰,處女下海對打時,因靚樣慘成「拳靶」而想喊,又表示會跟拍檔參與跳舞比賽,Odilia自言信心十足,但因練舞而周身傷。

同場還有英皇「發燒女聲」Elly,她透露正籌備新歌,走「虐心情歌」路線,又自爆經常畀仔飛及遇渣男︰「其中一個一腳踏多船之外,仲喺情人節呃我,話要學車而唔陪我。」