雅虎香港新聞 CFO財報解密│減息後我哋必需要認清嘅實況（Benny）
美國聯儲局會喺香港時間週四（9月19日）凌晨公布最新議息結果，毫無懸念今次會係自2022年3月、長達兩年加息周期以來第一次減息。呢個將會係全球焦點，因為市場都一直期待聯儲局一減息，就可以減低市場融資成本促進經濟活動，仲可以令到承受龐大利息壓力嘅機構、個人有喘息空間，同時亦令股市估值提升，但事實係咪就係咁完美？
美股外幣即時報價 多國新聞任睇
減息開始 衰退機率大增
今年以來，聯儲局回應市場減息時間表都係猶豫不決，表示需要更多控制通脹信心。直到8月底開始，當佢哋見到美國失業率明顯加速上升後，就冇再提信心問題，而係直接話降低利率時機已到。呢個反映控制通脹一直未完全令聯儲局官員滿意，但就業市場惡化令佢哋不得不將優先次序放咗喺挽救經濟方面。
所以要搞清楚，呢一刻減息嘅背景唔係通脹受控而係就業市場惡化，引致衰退可能性大增。
因為聯儲局利率政策有滯後性，而聯儲局官員冇足夠勇氣同前瞻性走在數據之前，往往佢哋嘅政策轉向都會係被動地受經濟轉向所影響。所以點解大部份過往歷史數據，都說明聯儲局減息就係經濟衰退嘅開始。
香港樓市 唔會即時受惠
好多人都會講：美國減息香港樓市就會有救，因為減息降低按揭供款成本、提升相對投資回報。但要認清一點：美國減息令香港市場按揭利率下調係有滯後性。因為港元市場利率，除咗受美國利率政策影響外，更受市場對港元供需關係嘅影響。
即係話喺聯儲局減息之後，你見到嘅只係金管局Base Rate 呢個官方利率，會秒速跟聯儲局減息，但係香港各大銀行嘅Prime Rate、HIBOR都唔會有即時調整嘅情況出現。即係話美國減息有利香港樓市說法，中間冇講到有滯後性問題存在，而且呢個滯後時間可以長達半年甚至一年。
美國通脹雖然由高峰大幅回落，但依然頑固。聯儲局減息其實係冒住通脹死灰復燃嘅風險，就好似美國喺70年代尾通脹大幅下滑，但喺80年代初再次反彈，更要高過前一次高位。說明稍一不慎，通脹依然會來襲。
因為而家減息係受經濟衰退嘅擔憂影響，但去全球化趨勢、持續緊張地緣政治衝突，都係令到生產成本好難可以大幅度降低，繼而長期維持通脹係低水平。
就算所謂嘅AI概念增加生產效率，但呢一刻所有大型科企做緊嘅都係對AI發展嘅激烈軍備競賽，全部以成本、資本支出行先（所以而家最發嘅係供應商NVIDIA)，所謂嘅生產效率全面提升，仲要經過呢啲企業喺AI投資上，有冇過分競爭、計算錯誤嘅不確定性長期洗禮後，先會真正睇到個結果。
總結而言，減息就係真正反映聯儲局官員對平衡通脹、就業最大化能力高低嘅開始。究竟佢哋係走在數據之前，可以喺就業市場進一步惡化前就勇敢地、有前瞻性地作出決定，定係又一次反映佢哋後知後覺，錯過最佳挽救經濟時機？
嚟緊第四季嘅數據，就會有更明顯、具體答案；冇人有水晶球，但減息係咪足以挽救香港樓市？亦都好快會有答案。
Benny Yam
執業會計師
本欄隔周三刊出
