CHILL CLUB頒獎禮︱Anson Lo奪兩大獎惹爭議 MC張天賦力壓Edan奪新人金獎

ViuTV年度音樂盛事《CHILL CLUB 推介榜年度推介21/22》喺噚晚（24日）圓滿結束，噚晚有逾百歌手參與，競逐「年度男／女歌手」、「年度十大歌曲」及「年度新人」等多個獎項，戰况非常激烈，成功吸引唔少網民關注，不如而家就同大家睇下網民對頒獎典禮有咩感受啦！

現場氣氛欠奉
《CHILL CLUB 推介榜年度推介21/22》由駱振偉（Thor）擔任主持，全晚獨力擔大旗撐場。再加上歌手喺得獎後未有喺台上唱歌，令到唔少網民認為頒獎典禮冇乜氣氛同好似好hea咁，留言話「Viutv chill club 得一個主持 個騷悶到」、「呢個節奏有點悶」、「成個頒獎禮感覺勁hea」、「老老豆豆一個主持真係唔夠」、「好無氣氛」、「得一個主持完全冇氣氛」、「D觀眾嘅冷漠程度睇到好老尷」、「Thor一個solo全場真係差咁啲」及「呀科做live mc未夠功力 氣氛好麻麻」等等。

變MIRROR頒獎典禮？
「親生仔」MIRROR擁有極高人氣，成為頒獎典禮大贏家。除咗團歌《BOSS》及成員單飛作品佔據「年度十大歌曲」嘅五個位置之外，Edan奪新人獎銀獎、MIRROR奪組合獎金獎、姜濤奪男歌手銀獎及Anson Lo奪男歌手金獎，鏡粉們都戥佢哋高興。另外，頒獎典禮上嘅差不多每一個表演環節都有MIRROR成員出現，不過部分網民就認為變咗MIRROR頒獎典禮，紛紛留言話「mirror頒獎典禮」、「ciao先得第10，一陣變mirror頒獎禮」、「Mirror pre紅館 concert」、「又係鏡粉世界」、「親生仔頒獎禮」及「鏡粉又玩爛了」等等。

MC力壓Edan奪新人金獎
今年新人競爭激烈，所以主辦方特別新增設金銀銅獎，最終由張天賦（MC）、呂爵安（Edan）及郭嘉駿（193）分別奪得「年度新人」金銀銅獎項。唔少網民都紛紛留言認為MC實至名歸，例如「MC實至名歸」、「MC真係抵攞新人金」、「Mc值得金獎呀」、「實力取勝 恭喜MC！」、「張天賦世一！！！」、「MC唱功勁好多」、「MC金賦實至名歸！今年再繼續努力」、「恭喜MC 靚仔又唱功好 11萬票新人金實至名歸！」及「恭喜MC 繼續唱多啲好歌比我哋聽」等等。

Anson Lo奪兩大獎惹爭議
「教主」盧瀚霆（Anson Lo）喺頒獎典禮上爆冷奪得「年度男歌手」金獎及「年度歌曲」兩大獎項，唔少「神徒」（Anson Lo fans暱稱）都紛紛留言恭喜教主，不過唔少網民就認為略欠說服力，留言話「接受唔到Anson Lo攞獎」、「年度金+年度歌 同當年林峯真係異由同工」、「我寧願keung 拎」、「冇張敬軒冇乜說服力」、「viu版林峯」、「成個樂壇又比班神徒玩X爛左」、「Ian, Jer, 甚至姜壽堆歌都好過Megahit啦」、「男金同十大第一都AL 係咪可以熄定機」、「Al 值得咩」、「軒叔永遠都係第一」、「教主啲fans真係害死佢」、「What? 軒仔到底差幾多票」及「歌手都冇資格叫」等等。

《Black Mirror》掀高潮獲狂讚
《CHILL CLUB 推介榜年度推介21/22》除咗頒獎之外，今年繼續搵嚟唔同嘅歌手及組合合作表演，當中MC $oHo & KidNey與MIRROR表演《Black Mirror》掀全晚高潮，唔少網民都大讚呢個環節好正，例如「全晚最好表演」、「Black mirror依段真係超級正」、「真係得viu tv咁大方咁玩得！呢part冇得輸」、「Black Mirror 嗰段真係超正，狂loop」、「Black mirror 嗰度正到起雞皮」、「正到爆！ 等咗呢個black mirror crossover好耐啦！」、「$oho Kidney好正 呢part好似歷史性時刻咁」、「夠膽玩，好睇.」及「估viu唔到 反而仲surprise 仲正」等等。

工作人員講嘢不慎被收音
喺噚晚，許廷鏗亦有喺頒獎典禮表演，唱歌期間有工作人員講嘢被收音，重複話「Keep going keep going」、「成件事好正㗎」及「總知我同你講，成件事係perfect㗎」，而佢哋講嘅嘢亦有出到街。事後Alfred亦有喺IG出Story表示自己有少少唔開心，因為希望可以盡善盡美，等觀眾可以有視覺同聽覺嘅享受。之後，佢再出PO話收到製作團隊嘅致歉，而佢話知道大家付出嘅努力，失誤係無人想亦都唔好受。另外，佢仲話ViuTV已經將修復版上載到網上。唔少網民除咗笑指以為係rap或獨白之外，亦大讚許廷鏗表現專業，留言話「Alfred 係勁，非常專業，可以繼續唱落去不受影響」、「Alfred 真係唱得好好，一啲都無受事件影響 希望你快啲開心返啦！」、「牙醫好專業唱得好好！支持佢」、「你已經做得很好」及「very perfect 專業！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！