So Ching否認退團 姜濤帶傷演出跪低 嚇親隊友

女團COLLAR成員So Ching因舞者男友阿Mo在MIRROR演唱會上受重傷後「停工」，相隔逾5個月後，兩隊組合在頒獎禮碰頭未見有芥蒂，MIRROR向So Ching送上鼓勵。而首度談及男友的So Ching讚阿Mo好Sweet，並指沒想過退團；至於目測達200磅的姜濤腳傷未愈，演唱期間突然跪地，嚇親隊友！

前晚《叱咤樂壇頒獎禮》圓滿結束，林家謙的歌曲連幕後獎，獨攬7獎成大贏家，而成績最彪炳是人氣男團MIRROR，團體獎連成員姜濤、Ian、Anson Lo、Jeremy的個人獎，總數達8個，至於奪「叱咤十大」歌曲及3連冠獲「我最喜愛的歌曲大獎」的姜濤，因腳傷休息兩個月後，其脹爆身材成焦點。

他受訪時表示未算最肥：「養傷冇做運動，已經唔敢上磅，前排仲肥，公司都叫我節食，但控制唔到。」隊友表示見他跪低也嚇親，姜濤承認腳仍痛，暫時不能跳舞。而ERROR成員肥仔也抽水，笑言在台下大叫「姜濤收皮」。

Anson Lo攞獎有陰影

而令姜濤無法第3年奪「我最喜愛的男歌手」的Anson Lo，談及林海峰（Jan）宣布他首獲此獎時表現猶豫，令Jan忍不住說：「使唔使我落嚟頒？」他笑言因去年被Jan整蠱存有陰影，對於撼低大熱姜濤，他說：「開心嘅，係粉絲對自己嘅認同。」

MIRROR表示看見So Ching歸隊，COLLAR終齊人很感動：「上年發生嘅事，對MIRROR同COLLAR係好大難關，經過6個月時間，可以同COLLAR一齊參加頒獎禮好開心，希望2023年有好開始。」又指想申請探訪阿Mo，但因疫情及醫院措施未成事，視頻探訪也要視乎阿Mo作息時間才可。

獲兩獎的COLLAR表示：「好感動，好耐冇一齊。」而So Ching自男友發生意外後首開腔，全程面帶笑容，指完全沒考慮退團，又稱跟阿Mo用語音功能溝通：「佢情況偏向穩定，佢開心我活躍番，係佢康復同治療上好大動力。（佢講乜鼓勵你？）唔係記得好清楚，但好Sweet。」昨日她在社交網多謝男友：「多謝你的堅強，教我靠着信念先可以走過來，2023年只有一個願望。」