Coffee林芊妤被KOL影射出席富豪飯局 嬲爆發千字文反擊：有把口講乜都得

Coffee林芊妤現正與老公、囝囝翟德彥（伯伯）身處泰國曼谷旅行，理應心情愉快，但就被一名KOL影射佢婚後參與富豪飯局，令Coffee嬲爆更發起千字文反擊。

近日，有名KOL自稱具有大量其他KOL秘密，於社交平台大玩「你問我答」；當中，有網民問及「Coffee從良之後，係咪無嘢聽？」該KOL就回覆︰「咩叫從良後，有野聽啦緊係。」；當回應邊個有份去富豪飯局時，佢就用上咖啡emoji回應，疑暗示Coffee有份出席相關飯局。Coffee留意到該KOL嘅言論，嬲到旅行期間都要於IG限時動態寫千字文澄清，表示自己真係好忙，要照顧家庭、工作及打理生意，但點都要澄清呢啲流言，覺得如果唔講嘢，呢個人只會越嚟越過分，鬧爆對方網上亂講無責任：「原來人只要有把口就講乜都得，咁樣一句說話就抺煞我咁多年嘅努力」，Coffee又指，相信呢個世界有報應：「希望我唔識嘅呢個人，會得到佢應有嘅教訓。」

Coffee嬲爆表示想寄封誹謗信畀該KOL，但無幾耐Coffee就於粉絲TG群組表示收回出律師信嘅決定：「我咁樣只會幫緊佢，依家我followers係咁升，我唔可以再幫佢」。Coffee又指，如果呢度有任何人懷疑佢嘅人格，請退出群組：「我都覺得我今朝衝動咗，其實佢講嘅嘢可信程度咁低，有留意開我嘅人知係假嘅。」有網民質疑該KOL說話嘅真確性，斥對方講到實牙實齒但點解唔開名；又有唔少網民追問陳靜、吳若希、陳詩欣和蔡嘉欣等又有無出席飯局，該KOL就回答指吳若希老公並非傳聞所講咁有錢，令網民大感好奇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！