COLLAR《造星4》隊友組兩新女團 STRAYZ「第5位」成員終揭開 Lolly Talk首支團歌走型格風

ViuTV選秀真人騷《全民造星IV》誕出新一代女團COLLAR，出道短短3個多月已推出兩首團歌，亦成為廣告商新寵兒。然而，《全民造星IV》亦造就出另外兩隊女團：Lolly Talk及STRAYZ。

Lolly Talk與COLLAR同為8人組合，成員包括阿蛋（黃詠霖）、阿Yo（郭曉妍）、 Tania（陳紀澄）、Elka（鄭芷淇）、Yanny（劉綺婷）、Sinnie（吳倩怡）、MeiMei（曾美欣）及阿妹（黃敏蕎），過往以拍片及cover歌曲為主嘅佢哋日前（15日）推出首支團歌《8SEC》，亦係《香港電競超級聯賽第二季》主題曲，MV截至19日觀看次數已達逾23萬；Lolly Talk喺MV中以型格打扮唱跳吸引唔少觀眾讚好，指即使喺有限資源下製作但成果都好好：「Lolly Talk絕對係為香港女團訂下新標準！冇太多資源SUPPORT都做得到呢個水準, 值得尊重！」、「今次即使係型格風，佢地都carry到，真係要俾掌聲」、「其實真係唔比collar差！」、「無公司support都做到好似有公司support 咁，好勁啊」等等，評價相當唔錯。

至於STRAYZ係一隊5人組合，由趙展彤（VAL）及CK（黃斯琪）拉隊組成，日前佢哋分享尋找榛綦（何榛綦）、Ariel（曾家瑩）及「第5位」成員加入嘅過程。STRAYZ現時已有IG專頁，並透露目前正錄製新歌，而STRAYZ亦於噚晚（19日）喺IG公開女團合照，一直保持神秘嘅「第5位」成員身分終於揭開，原來就係愛以中性打扮示人嘅暐翹（林暐翹）。

曾經於《造星4》總決賽落敗而感到茫然嘅暐翹亦喺IG限時動態分享，以為過咗造星後一段時間都無得再表演，表示自己要回來了：「一個電話令我成個人既靈魂返曬嚟，依一日我期待咗好耐，我唔需要賺到好多錢，我只係想表演、唱歌、跳舞。」暐翹又指，每個STRAYZ成員都係佢榜樣；唔少網民都喺暐翹IG留言表示好開心終於齊人，仲話期待佢哋日後發展：「正喎，全部都有實力」、「見到團相已經好好好期待第一首團歌」、「呢個組合好全面喎，Dance、Vocal、Rap、門面、創作都有齊」、「真係好開心，我會愛晒你哋五個」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！