Edan呂爵安新歌MV女主角 龔慈恩大女林愷鈴係港大高材生 仲係清朝皇室後裔？

MIRROR成員Edan（呂爵安）今年推出三首歌曲，每首嘅MV女主角都係女神級人物。《E先生連環不幸事件》有20歲女Model Mandy （譚旻萱），《小諧星》直情越級挑戰搵周秀娜！最新歌曲My Apple Pie尋日推出，而MV女角就由「最強星二代」林愷鈴(Ashley)擔任。MV入面Ashley要受同學欺凌，仲要拍喊戲，可以話係演技大考驗。

林愷鈴父母係90年代台灣電視界小生林煒，同埋前TVB花旦龔慈恩。龔慈恩當年去台灣拍劇而同同劇嘅林煒撻著，1999年結婚，2000年林愷鈴出世。但係林煒2019年被傳媒影到同其他女子行為親密，事後佢承認同龔慈恩已經離婚2年。林煒曾經自稱母親係清朝皇室後裔，如果係真的話，咁林愷鈴都算係有皇室血統！

眼見仔女開始大個，龔慈恩2012年復出幕前，並簽約杜琪峯嘅銀河海潤。林愷鈴15歲嘅時候跟媽咪出席傳媒活動，清純外表加長腿被外界稱為「最強星二代」，後來Ashley仲同媽咪簽埋同一個經理人，正式入行。

外表出眾之外，林愷鈴學業成績都相當亮麗，中學喺名校聖保羅男女中學畢業，參加IB文憑考試更考獲41分佳績，順利入讀心儀嘅港大建築系。Ashley8歲已經考到6級鋼琴，近年又考到聲樂8級，並且識玩多種樂器。

下年大學畢業嘅林愷鈴，有晒星二代背景、才藝同外表呢啲藝人基本條件，咪就係贏在起跑線囉。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！