ERROR自爆96小時｜193郭嘉駿爆喊重提嘲曾志偉一事 解釋：我係好輕佻無禮

「宇宙天團」ERROR宣布將於12月16至18日喺九展舉行一連三場《明星生活ERROR Live Show 2022》演唱會，令一班404大感期待。而近日由ERROR主持嘅綜藝節目《ERROR自爆96小時》同樣受歡迎，193郭嘉駿於節目真情流露，兩度落下男兒淚，重提去年串爆TVB總經理曾志偉一事，193哽咽表示：「我知我講錯話，我係好輕佻和好無禮地說那句話」。

193於第二集節目中剖白做藝人承受咗唔少壓力，等開工化妝時寧願扮睇稿、玩電話、聽歌，放假唔敢出街，懷疑自己患有人群恐懼症。去年，193於《最後一屆口罩小姐選舉》總決賽接受訪問時，反擊曾志偉指ViuTV收視只能媲美J2言論：「J2係做咩？冇記錯係咪40幾歲仲話後生仔傾偈嗰個？」，直率敢言性格因而人氣急升。被問到係咪自從「153事件」後人生有咗突變，193就直言有好大轉變，成個人生同事業都唔同晒，又眼紅紅解釋當時講嗰番言論原因：「係因為我睇完兩位口罩小姐比賽之後，我有啲嬲，我睇完佢哋兩個綵排好差，而我期望佢哋唔係咁。我之後就要出去做記者訪問，嗰下其實我係有少少衝動，因為5分鐘前我仲係嬲緊佢哋表現得唔好」。

193強調自己非針對曾志偉，而係維護自己公司及同事： 「我覺得我台拍嘅綜藝好好睇，大家都好努力 ，我想維護我個台，所以先講呢番說話，你唔可以話我哋係小眾，你唔可以用自己觀點話我哋個台唔好，我想維護返呢群好努力嘅人，所以就咁樣講。我唔係針對一個人，我係針對嗰一句說話，去批評我哋個台。」193更指知道自己講錯話：「我真的不是針對曾先生，因為他是一個長輩，別理外間對他的批評，我年幼看他的節目時，他真的帶動到香港娛樂圈和氣氛，令到人收看電視和感到開心，所以每個人我都尊重，但因為傳媒炒作，將矛頭是指向一個人。」ERROR其他成員亦被問到「是否成也193，敗也193？」，保錡即回答：「沒問題架，這幾年我們都經營了好多東西出來，就算是敗，我們都會扯住他，頂多是個團隊沒有廣告，但依然可以做作品。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！