ERROR全員上《CHILL CLUB》宣傳新歌 保錡成功洗底 獲網民支持

「宇宙第一男子天團」ERROR成員吳保錡（Poki）年初被揭疑背女友暗交「宅男女神」張沛樂（沙律）及喺直播期間爆粗，令其形象即時跳樓式插水，事後更宣布暫別幕前工作。不過早前播出嘅ViuTV綜藝節目《ERROR自肥企劃》令ERROR人氣再度急升，連帶保錡都成功洗底獲得觀眾原諒。ERROR近日推出新歌《我們不Chok》，噚晚亦亮相《CHILL CLUB》宣傳新歌。

新歌《我們不Chok》係ERROR今年第二首派台歌，除咗有阿Dee負責填Rap嘅歌詞之外，保錡亦有參與作曲。好耐冇喺幕前演唱嘅保錡似乎感觸良多，噚晚喺IG寫上感受話：「很久沒有上這個舞台，每一首歌曲都有背後的意思，每一首歌曲都有背後的經歷，感動能唱歌給你們每一個聽。」

呢個PO一出，唔少網民都紛紛留言支持，例如：「我們不碎啊啊！四個齊齊整整一齊上係特別有意義 最緊要係唱得好好聽！等你地talk show/演唱會啊！」、「睇終於四歸一返Chill Club唱《I Promise》啦 大佬把聲全集都好穩定 最有驚喜係《I want it that way》尾段嗌，勁好聽～ 每首歌都好有意思，相信大家都收到晒！」、「喜歡你今晚的演出，你很投入、很放、很享受，唱功及台風都進步了」、「勁感動，想你地開演唱會」、「睇到你唱得好肉緊好enjoy舞台，高興睇到你地四歸一，位位獨有魅力」及「好鐘意你每次都珍惜舞台嘅認真 好charm啊」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！