ERROR「平起平坐」攞組合獎 AK落閘唔退團高呼「愛MIRROR」

·2 分鐘文章
受退團傳聞困擾的AK,收拾心情載歌載舞。
受退團傳聞困擾的AK,收拾心情載歌載舞。

人氣男團MIRROR副隊長Anson Kong(AK),早前在社交網個人簡介刪走團名疑玩「割席」,因而傳出退團疑雲,他澄清受字數限制才忍痛「割愛」!首奪組合獎的ERROR興奮可以跟MIRROR平起平坐,成員保錡更搞爛Gag,稱由薛家燕頒獎全因「皆大歡喜」!

MIRROR在樂壇首張成績表《新城勁爆頒獎禮2021》開個靚頭,擸走2個團獎及7個個人獎,隊長Lokman受訪時謙稱多獎只因人多勢眾,升呢攞「勁爆男歌手」的成員Jer,自言年資比其他男歌手短,之後會繼續努力做歌;新人獎大熱Edan亦順利拔頭籌!

首個頒獎禮已取得亮眼成績,問是否打下強心針?副隊長AK表示每次都抱着參加Party的心態,又形容是「做節」見前輩及歌手朋友。提起早前一度刪走社交網簡介的「MIRROR」字眼而惹退團疑雲,他有點不耐煩地說:「係呀!Bye Bye!阿媽都問咗我好多次,其實阿姜(姜濤)都冇寫。」Lokman即幫口:「佢話係參考我嘅,隊長都冇就可以冇,但佢忽略咗我係由頭都冇寫過。」AK再解釋:「呢幾年開拓咗好多想做嘅嘢,個簡介有文字限制先Cut咗。」並搞笑高呼:「我愛MIRROR,Yeah!公司加人工,Yeah!」向Fans派定心丸。

炎明熹姚焯菲「朝聖」

開齋奪組合獎的同門組合ERROR,搞笑表示很滿意大會安排:「冇分金、銀、銅好聰明,終於可以同MIRROR平起平坐,冇對比就冇傷害!」問是否有信心在往後的頒獎禮再得獎,隊長肥仔「倒米」搶答:「我哋係有信心攞唔到獎!」準備坐足一晚的193笑言會準備咖啡提神。

另外,歌后之一的鄭欣宜表演期間仆親,自嘲似反轉的烏龜:「好彩我面皮夠厚,冇整親!」首奪男歌手獎的馮允謙揚言完全冇諗過,自爆幾年前灰心到萌退意。「聲夢」人氣王炎明熹及姚焯菲首度參加頒獎禮便獲新人獎,曾揚言想「朝聖」見MIRROR的她們,指對方坐在前幾排,見面時有點頭打招呼。

MIRROR與ERROR同奪組合獎,皆大歡喜!
MIRROR與ERROR同奪組合獎,皆大歡喜!
Anson Lo
Anson Lo
姜濤
姜濤
炎明熹(左)與姚焯菲大熱奪新人獎。
炎明熹(左)與姚焯菲大熱奪新人獎。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能