F4出道20周年 言承旭單身 吳建豪情路迂迴 周渝民朱孝天婚姻美滿?

·4 分鐘文章
《流星花園》
《流星花園》

台灣藝人言承旭、周渝民(仔仔)、朱孝天同吳建豪喺2001年劇集《流星花園》播出後知名度上升,同年正式組成偶像組合出道,代表作「流星雨」唱到街知巷聞,出道無耐就舉辦咗歷時4個月嘅世界巡迴演唱會。唔單止紅遍東南亞等地,更加畀美國媒體用「亞洲之光」嚟形容佢地。F4出道以嚟不斷傳出不和傳聞,而且個性唔同,又有唔同發展同興趣,最終喺2009年宣布單飛發展。對於不和消息,言承旭同朱孝天就曾經喺內地節目直認4個人喺生活上無太多交集,好似同事關係一樣;言承旭又指「我那時候還曾經開玩笑,如果我們再站在舞台上唱歌,有的都生小孩了,就抱小孩在手上,然後我們4個站在台上...那個畫面我會覺得很溫馨。」

2013年F4參與江蘇衛視春晚錄製合體演出後,粉絲一直期待佢哋能再次走埋一齊,2020年江蘇衛視宣布F4將會喺《一千零一夜》晚會合體,不過事後卻被踢爆只有吳建豪真人現身舞台,其餘3人係「特效同框」假合體演出,令粉絲失望,仲大罵主辦單位貨不對辦。20年過去,周渝民喺早前出席劇集發布會被媒體問及F4合體嘅事,佢就話前幾年有同成員討論過,但都不了了之。當年紅透半邊天嘅大男孩,如今每個人都有自己唔同發展,佢地嘅近況又係點?

【言承旭】單身黃金漢
44歲嘅言承旭無論樣貌定身型都保持當年高水準,近年專注內地影視圈,其中同相差20年內地女星沈月情侶檔演出嘅劇集《我好喜歡你》成為話題,而下月上映嘅電影《有一點動心》都叫粉絲期待。事業上有穩定發展,不過過往多主演愛情劇嘅言承旭就令粉絲感慨到宜家都未搵到另一半。佢一直同女星林志玲糾纏不清,直至林志玲2019年閃嫁日本放浪兄弟成員AKIRA而結束;及後同有「台版全智賢」之稱嘅張熙恩拍拖2年,分手後一直單身至今。

言承旭
言承旭

【周渝民(仔仔)】擁有美滿婚姻
39歲嘅周渝民出道憑濃眉大眼吸引粉絲,人氣高企;單飛後專注影視圈發展,2009年憑劇集《痞子英雄》入圍金鐘獎視帝候選人之一,可惜大熱倒灶,直至2013年終以劇集《回家》奪得視帝殊榮,成為首位稱帝嘅F4成員。近年周渝民將重心轉移內地,不過發展平平,幸運嘅係佢愛情運一向唔錯,分別同許茹芸、許瑋倫傳過緋聞,2005年曾公開同大S相戀,雖然分手收場,但就因為拍攝《痞子英雄》而同細6年嘅喻虹淵加深認識,2015年11月毫無徵兆下宣布二人已登記結婚,而婚後喻虹淵亦淡出演藝圈照顧女兒。

周渝民
周渝民

【吳建豪】同前妻撕破臉離婚 目前單身
42歲嘅吳建豪熱愛音樂,F4解散後曾經同韓國歌手安七炫組成亞洲首支跨國組合Kangta & Vanness;2016年發行個人專輯「#MWHYB 音樂不羈」,可惜未有太大話題,相反主演劇集《下一站,幸福》、電影《葉問4:完結篇》演出令人更有印象。至於感情方面,2013年同新加坡千金石貞善(Arissa)結婚,可惜二人婚姻僅維持短短5年,不時喺IG互相批評對罵,據說吳建豪連寄2封離婚協議書,以「彼此已無共同生活逾3年」、「老婆不支持他事業」、「興趣不相同」為離婚理由,但石貞善就退回,鬧上多個傳媒嘅頭版,後來石貞善代表律師證實佢決定結束受傷同痛苦嘅生活而離婚,吳建豪目前係單身狀態。

吳建豪
吳建豪

【朱孝天】愛情最得意
42歲嘅朱孝天單飛後專注影視圈發展,不過由2018年開始就甚少有新作,多年嚟嘅代表作為《楚留香傳奇》。朱孝天過去情史相當豐富,曾經同過林熙蕾、楊謹華、吳亞馨、姜欣雨拍拖,2016年宣布同相戀1年嘅韓雯雯結婚。二人因拍攝電視劇《美夢成真》而相識,朱孝天接受訪問就大方承認當初對老婆係一見鍾情,二人婚後結伴出遊,雖然未有愛情結晶品,但仍非常幸福。朱孝天曾經接受訪問時就坦言,自己因為罹患罕見疾病,所以都唔會強求生小孩,未來都有機會領養小孩。

朱孝天
朱孝天

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!