Gin Lee開騷被撞跌咪 傻笑執生

入行10年的「環球一姐」李幸倪（Gin Lee）前晚開騷，穿上性感舞衣載歌載舞，期間不慎被舞蹈員撞跌咪，嚇到呆一呆後隨即執生，忍不住喪笑！

Gin Lee前晚在會展舉行演唱會，獲姚子羚、《聲夢傳奇》學員炎明熹、文凱婷、師妹陳凱詠及Eric Kwok等捧場，Gin甫開場即連唱多首大熱作品，包括《今天終於一人回家》及《雙雙》等，期間螢幕播出其童年至成長照，亦有與家人的合照。其後她換上短褲跳唱快歌《IDK》，怎料老貓燒鬚跌咪，她與舞蹈員即時踎低執咪，然後繼續表演，獲全場拍手歡呼！

家人視像打氣

其後她與Fans打招呼，表示很開心能夠開騷，可惜身在馬來西亞的家人未能親身支持：「爹哋媽咪次次都嚟睇騷，但依家疫情飛唔到，所以Video Call佢哋，畀佢哋感受現場嘅熱情。」說畢即與父母、家姐及姐夫視像通話，高呼：「好掛住你哋！」她又與Fans互動，讀出Fans寫給她的信及玩遊戲，最後約定大家下個10年一起行下去。

騷後受訪時談及跌咪一事，Gin笑說：「我呆咗半秒唔知做咩，應該畀Dancer隻手『發』到，所以跌咗支咪，我反應唔切，嚇一嚇！我執嘅時候，Dancer都幫我執番，都叫做處變不驚嘅。」問到富貴圈外男友有否捧場？她一貫避談：「男朋友、女朋友、大朋友、小朋友都嚟咗。」問下次是否在紅館開騷？她說：「籌備緊，同公司傾過，今次有啲歌迷嚟唔到，希望下次開個大啲嘅場，開多幾場。（希望家人嚟？）係囉！今次好可惜，爸爸媽媽1個月前問我呢個騷係幾時，好似想睇，但嚟唔到。」