Google 搜尋榜 2024｜《城寨》劉俊謙登頂「本地娛樂名人榜」 MIRROR十強不入 呢隊男團反而突圍成功！

Google 今日（10日）公布年度搜尋榜，娛樂方面公布「熱搜本地娛樂名人」、「熱搜環球娛樂名人」、「熱搜劇集」、「熱搜歌曲歌詞」及「熱搜演唱會」等多個榜單。「熱搜本地娛樂名人」榜單中，喺《九龍城寨之圍城》飾演「信一」，有「國民老公」之稱嘅劉俊謙成功登頂；最新同Edan屢傳緋聞嘅「大馬女神」林明禎及對未婚妻Chris非常專一嘅李龍基就緊隨其後分別位列第二第三位。人氣男團MIRROR則大強不入，反而今年透過「亞洲超星團」成團 Loong 9 就排第四位。

另外，爆出與‎歐倩怡離婚嘅郭晉安排第五位。除咗劉俊謙外，《城寨》林峯、伍允龍亦榜上有名，分別排第六、第七位。第八至十位就有出演《黑色月光》嘅馬志威、鄭中基經理人何慶湘（湘姐）及《中年好聲音2》冠軍古淖文。

「熱搜環球娛樂名人」方面，榜首嘅藝人係國際天后Taylor Swift，今年佢獲新加坡政府邀請喺當地舉行演唱會，成為一時熱話，佢亦都喺「MTV音樂短片大獎」奪得年度藝人等大獎，人氣非常旺盛。即將來港喺啟德體育園開Show嘅Coldplay排第二，而陷入風波嘅HYBE女團ILLIT就排第三位。