「H富豪」男友曝光？張曦雯與健碩男貝沙灣溫馨放狗

28歲嘅無綫上位小花張曦雯（Kelly）憑無綫劇集《律政強人》及旅遊節目《3日2夜》而人氣急升，成為唔少男士心目中嘅女神。除咗因為佢外貌討好、身材火辣之外，佢仲有一個男士們都好欣賞嘅元素，就係鍾意打機！佢網上直播打機時表情多多，有時仲會真情流露咁大爆粗口，毫不造作嘅真性情，被網民追捧為「打機女神」。Kelly一向不乏追求者，早前Kelly就被傳出同身家過億，家住淺水灣嘅「H富豪」拍拖，生活仲越嚟越富貴，又週遊列國、又買名車、又睇北角半山豪宅，過豪華生活。雖然Kelly已經否認咗，但係紙包唔住火，最近就被人影到佢同一名男士去放狗。

女神嚟緊仲有幾部電視劇排住隊出街（《跳躍生命線》、《白色強人》、《金宵大廈》及《解決師》），事業發展相當不俗，原來愛情亦都相當理想。最近Kelly被影到佢同一名年約40歲嘅健碩男喺貝沙灣放狗，男方身材健碩又靚仔，仲幫手拖住Kelly嘅柴犬Nala。佢哋仲有約埋幾個朋友一齊行，期間呢位男士對Kelly十分照顧，Kelly同狗仔玩嘅時候，佢一直喺旁邊守候，場面溫馨到好似一家人咁。放完狗之後，佢哋就慢慢行返去貝沙灣住宅。

如果Kelly真係拍拖，相信會令唔少男士心碎啦！