HAPPY伯澄清同屯門娜娜只係養父女關係 兩次婚姻離異收場

屯門娜娜(董幸兒)喺公園賣唱成為網路紅人,連帶佢嘅頭號fans HAPPY伯都備受注目,佢地嘅關係更引起討論。早前娜娜被爆同男友「迪康」結婚,大家都好擔心HAPPY伯係咪失戀。有傳媒訪問HAPPY伯俾機會佢自白,更自爆曾經有過嘅2段婚姻。

娜娜同男友迪康今年初傳出婚訊
娜娜同男友迪康今年初傳出婚訊
HAPPY伯觀禮之外,仲同迪康合照
HAPPY伯觀禮之外,仲同迪康合照

今年81歲嘅HAPPY伯,2006年開始喺屯門公園打躉,主要係睇人吹簫,到2017年見到娜娜喺公園演唱,覺得佢表演得唔錯,即刻封一百蚊利是打賞之餘兼「抄牌」(拎聯絡方式)。娜娜同HAPPY伯嘅「友情」由此展開。

HAPPY伯唔止係歌迷,就連娜娜下半生幸福都設想埋,試過介紹男仔俾佢識,又提醒佢年紀開始大要搵個男人。娜娜同男友交往之後,更試過約埋HAPPY伯飲茶,絕對唔係外界認為嘅非份之想,難怪HAPPY伯知道網民諗法之後都話「好燒」(嬲爆),佢仲表明如果娜娜老公唔希望HAPPY伯去搵娜娜撐場,佢一定會尊重。

至於課金支持街頭表演係咪畀人搵笨?HAPPY伯直言睇到人唱得好先會畀,自己有節制,而且畀得開心。以前HAPPY伯喺其他訪問提過俾娜娜嘅打賞先後計埋有20萬,而佢喺訪問都話視娜娜係養女,係發自真心愛佢,亦唔抵得其他人對娜娜唔好。

如今單身嘅HAPPY伯,一生人結過2次婚,1965年娶咗第一任太太,兩人育有一對仔女,但後來分開。到1999年,當年57歲嘅HAPPY伯再婚,第二任太太本來喺佢個仔打理嘅工廠打工,結婚時只有29歲。到2006年太太成功申請來港同HAPPY伯一齊生活,但係相見好同住難,太太性情唔同晒,令HAPPY伯難以適應,4年後主動提出離婚。而家一個人住500呎公屋嘅HAPPY伯,自言有諗過再搵伴侶,但諗到年事已高就打消念頭,寧願同朋友飲茶吹水,當然唔少得睇人唱歌跳舞。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!