Ian私有化盧慧敏:真係收割咗女神

東方日報
·3 分鐘文章
Ian與盧慧敏拍劇時朝夕相對,撻出愛火。
Ian與盧慧敏拍劇時朝夕相對,撻出愛火。

歌手陳卓賢(Ian)與混血兒索模盧慧敏(Amy)因合作拍劇而撻着,Ian無懼戀情曝光,但否認戀愛大過天。跟多位女星傳緋聞、獲封「女神收割機」的他自認當之無愧,因為女友是「真女神」。

Ian、Amy與黃定謙早前合作ViuTV新劇《無限斜棟有限公司》而成好朋友,Ian更跟Amy擦出愛火花。3人日前接受本報專訪,Ian認為拍拖是正常事,不介意公開,但最怕被套上戀愛大過天的罪名:「我哋工作好認真同專業,唔希望畀大家覺得拍拖會影響工作,將來無論唱歌或演戲都會做得更好。(粉絲對於你封盤點睇?擔唔擔心有影響?)唔擔心,相信大家好理性,佢哋都好支持。」

唔願拍咀戲

Ian曾先後跟前港姐冠軍陳曉華、宅男女神蘇皓兒等扯上關係,被封「女神收割機」,他笑言:「咁依家真係收割咗個女神,係實至名歸。(同之前傳緋聞嘅女星係咩關係?有冇追過佢哋?)可能咁寫大家覺得juice啲,加上我本身認識嘅女性唔多,所以同我合作過或者社交網有follow嘅女仔都被人咁寫。(同佢哋有冇聯絡?)冇,本身都冇保持聯絡。」

問Amy是否百分百信任男友?她說:「我哋相處咗半年,工作時日對夜對,見到嘅大家係好真實,好清楚佢為人。(佢畀到安全感你?)嗯!」問到將來拍劇會否向對方備案?Ian說:「大家會話畀對方知,但唔會干涉對方工作,唔會因為佢做咩角色或做咩戲而有情緒。」

Ian在劇中向Amy獻出螢幕初吻,問到有何感受?他笑言拍攝前不太情願:「拍之前好緊張,甚至唔想,怕演起上嚟好尷尬,但後來大家熟咗就少咗尷尬,事前大家會講點準備。(拍嗰陣定之後撻着?)冇刻意定個timeline。」問到女友有何欣賞之處?他說:「佢對人好好、好善良、為人着想,係個好好聆聽者。」Amy則指初時覺得男友是偶像,會有距離感,但相處後沒這種感覺。

黃定謙讚襯到絕

劇中2人與黃定謙是三角關係,現實中Amy稱從未試過:「因為我好怕麻煩,唔好搞咁多嘢,我比較老派,感情上基本係要一對一。」而黃定謙笑言見證2人拍拖,非常戥他們開心:「拍攝時唔覺有乜蛛絲馬迹,因為我好專心工作。」並讚2人很合襯:「Ian係好識照顧人嘅暖男,Amy就係畀Model耽誤嘅喜劇演員,好搞笑!」

黃定謙(右)與Ian於劇中力爭盧慧敏芳心。
黃定謙(右)與Ian於劇中力爭盧慧敏芳心。
盧慧敏撐男友夠專一,不介意對方之前的緋聞。
盧慧敏撐男友夠專一,不介意對方之前的緋聞。