Ian陳曉華驚爆5角戀 正印盧慧敏登場

·3 分鐘文章

前港姐冠軍陳曉華被踢爆暗撻組合MIRROR成員陳卓賢(Ian),但亦有傳她偷偷翻撻舊愛狄以達,男方更忽然清空社交網,似此地無銀!而昨日又傳出Ian一早與余潔滢拍劇戲假情真,但原來真命天女是奪去他螢幕初吻的盧慧敏(Amy),5角戀大爆炸!Amy的經理人公司未有否認戀情。

陳曉華與Ian因一架車兩份揸而爆出緋聞,不過更爆是之後傳出的5角戀,捲入其中的人愈來愈多,好睇過電視連續劇。昨日傳出她與舊愛狄以達到九龍灣拍拖買家品,疑藕斷絲連,雖然兩人冇拖手等親密動作,但行街時表現避忌,不欲被人認出,而最詭異的是,自陳曉華與Ian爆緋聞後,狄以達一直潛水沒有回應,更忽然將社交網清空,耐人尋味。

親揭與狄以達關係

昨日陳曉華接受電話訪問,問到與兩男是甚麼關係?她說:「同阿達一直都係保持朋友關係,大家都有共同朋友,會一齊聚會。當日只係聚會前出去買少少嘢,唔係拍拖,現階段都係以工作為重。同Ian係朋友,係佢賣架車畀我嘅,下個禮拜就會完成手續。」

至於Ian昨日被傳與《男排女將》中飾演其女友「安安」的余潔滢假戲真做,劇中有錫面鏡頭,疑日對夜對擦出愛火,不過女方昨日斬釘截鐵斷言與男方不熟,連對方電話也沒有:「其實我同Ian只係工作上面認識,喺現實生活中我哋唔係好熟,冇乜傾偈,連電話號碼都冇㗎我哋。只係一對螢幕情侶,唔知係咪觀眾太投入、定係咩誤會,總之就係我同佢真係唔係咁熟㗎咋!」Ian的經理人花姐對於兩人傳緋聞,只回覆:「不作回應。」

余潔滢堅稱唔熟

余潔滢極速否認,原因是真命天女原來另有其人,對方正是朱鑑然前女友、中墨混血女模盧慧敏,她與Ian早前因拍ViuTV劇集《無限斜棟有限公司》而結緣,更在劇中奪去男方的螢幕初吻,疑錫出戀火,而她亦有客串《男》劇,連續合作2劇,名正言順做「跟得女友」。有傳兩人拍劇期間公然打情罵俏,女方更施以揼骨及餵食2招箍男友,對方亦十分受落,於是傳出因為Ian的關係,給Amy安排客串《男》劇。對於前日結局篇突然加插Amy出現,《男》劇監製陳淑賢否認跟Ian有關:「完全唔關事,九唔搭八,只係想最尾加個女仔,代表夢想無界限,女仔都想嚟。Amy係我哋自己揀,唔關Ian事,面試時覺得佢好靚,就揀咗佢。」她表示不清楚兩人是否認識及拍拖:「Amy只係拍咗1日戲,我淨係知Ian開工時好專心,多數自己匿埋一邊或者同隊友傾偈。」而Amy的經理人只回覆:「冇回應。」未有否認拍拖。

與27歲Ian同齡的Amy,最為人認識是她與朱鑑然曾傳出訂婚消息,其後男方經理人否認其事而且已分手。朱鑑然昨日被問到與Amy目前的關係,他說:「多謝關心,依家係朋友關係。」至於Ian的過去就更加精彩,有傳他參加《全民造星》時,先後撻着藝人陳俞希和蘇皓兒,故有「女神收割機」之美譽,可謂名不虛傳。

被捲入事件的余潔滢,急急澄清。
被捲入事件的余潔滢,急急澄清。
狄以達突然清空社交網,點解呢?
狄以達突然清空社交網,點解呢?



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能