J.Arie情人節解約離邵氏 為追音樂夢甘願捱麵包

·3 分鐘文章
雷深如 J.Arie
雷深如 J.Arie

歌手J.Arie(雷深如)大學畢業後冇做律師,反而選擇加入樂壇。2013年加入太陽娛樂後獲力捧,入行初期風頭一時無兩,不過去到2019年佢決定離開,轉做獨立歌手。咁啱當時邵氏向佢招手,J.Arie毅然同邵氏簽5年合約,估唔到佢入咗邵氏一年半就提早解約,喺情人節回復自由身。

J.Arie就話佢上年推出左兩首比較偏激嘅歌包括《雙面哈菲》和性上癮為題材嘅《陰陽道具》,當時「性女」型象嚇親高層。之後佢知道自己叛逆性格無可能綁係邵氏,所以嘗試同樂易玲傾談解約,樂小姐覺得佢做嗰啲歌搞到個人咁癲,好唔正面,係返唔到大陸。 而J.Arie都知道自己越嚟越違背邵氏對藝人嘅要求,所以最終獲得放生。

回顧J.Arie過去呢一年半,佢只拍過兩套劇,分別係《非凡三俠》和《陀槍師姐2021》,但其實呢兩個角色完全冇得發揮,加埋得4句對白,同路人甲冇分別。《非凡三俠》中佢去到大馬拍攝一場戲,劇情係佢喺cafe見到張智霖,遞本書俾佢問可唔可以簽名,及自稱係佢粉絲,但最後套劇出街對白被cut走。而《陀槍師姐2021》就係佢出場講殺咗男朋友落口供時爆喊,呢套就有3句對白。

由於J.Arie同邵氏合約唔係包薪,所以出糧得4位數字。J.Arie直認被迫做「月光族」,更話呢刻銀行戶口積蓄有5位數字,已經算係入行以嚟最多錢。另外,佢仲話咁多年為咗做音樂甘願捱麵包,有時全日食21蚊嘅菠蘿油加杯熱奶茶,全日只食呢一餐,其餘時間就飲水和食梳打餅。

大家都知J.Arie係港大法律學士,當年佢唔理父母反對要入行做音樂。最初入行佢有個10年計劃,不過而家過咗8年。佢想到40歲時再睇下點,大不了到時再返去讀返個法律牌,但依刻冇人阻到佢做音樂。

雷深如 J.Arie
雷深如 J.Arie
雷深如 J.Arie
雷深如 J.Arie
雷深如 J.Arie
雷深如 J.Arie
雷深如 J.Arie
雷深如 J.Arie

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!