JC陳詠彤上《中國好聲音》唱成名作《說散就散》獲導師網民大讚

曾被黎明力捧嘅女歌手陳詠彤（JC），前年憑住出道作《說散就散》為人認識，不過可惜紅歌唔紅人，唔少人連佢係咩樣都未必有印象。星運平平嘅佢近排轉戰內地，現身由周杰倫、謝霆鋒、李健及庾澄慶做導師嘅內地歌唱選秀節目《中國好聲音2018》，更唱出成名作《說散就散》。

喺第四集嘅導師點歌環節中，李健就點咗《說散就散》，原唱者JC上台落力演唱，佢深情演繹歌曲，獲得導師們賞識，庾澄慶及李健更轉身大讚其唱功。李健仲話JC一唱佢就斷定佢係天生唱歌嘅人，不過最終佢選擇加入庾澄慶嘅戰隊。佢仲話首歌喺香港好紅，但就冇人認得佢個樣。跟住周杰倫就心同感受咁話自己推出第一隻碟後，成條街都播住《黑色幽默》同《安靜》，但就冇人同佢打招呼，為咗俾人認到佢，周董仲試過著宣傳海報嘅衫，但係都冇人認得佢，所以佢好明白JC嘅感受。

節目出街後，JC瞬間爆紅，引起網民熱烈討論，唔少人激讚佢「唱得好好」及「唱出故事了」等等，「說散就散原唱」更登上微博實時熱搜榜第一位。相信經過比賽之後，好多人都會記得佢個樣同歌聲。