JJ林俊傑演唱會｜陳卓賢Ian任嘉賓被臨時取消 監製發文公開道歉 花姐：期待未來有機會合作

歌手林俊傑（JJ）日前（17日）就喺中環海濱開始舉行6場香港演唱會《JJ20世界巡回演唱會香港站》，第二場（18日）就搵嚟歌手黃貫中做嘉賓，兩人合唱《海闊天空》。去到噚晚嗰場（19日）就傳出嘉賓會係人氣男團MIRROR成員Ian陳卓賢，不過最終Ian就冇喺舞台上出現，而主辦單位事後亦都回覆傳媒證實本身係有Ian作為嘉賓，但係最終因為溝通上出現問題取消。 喺稍早時間，演唱會香港區監製亦都發文澄清並向Ian及MIRROR致歉，MIRROR經理人花姐亦都回應傳媒話已經收到有關方面嘅道歉，仲話期待MIRROR未來有機會可以同JJ喺音樂上多方位合作。

早係演唱會開始前，網上買賣平台已經有人以「19/3嘉賓MIRROR」作招徠，亦都有粉絲指Ian噚日有參與過演唱會彩排，不過最後就冇喺舞台現身，而主辦單位之後回覆傳媒查詢時就表示，由於與MIRROR方面溝通上出現問題，所以取消相關演出。

雖然Ian無喺舞台現身做嘉賓，不過MIRROR成員邱士縉Stanley就喺社交網分享同Ian、Ak、Lokman等MIRROR成員一齊嘅合照並留言「要記念吓!!」，而Ian亦都有轉發並留言「記低」，有網民就認得佢哋背後場景正正係中環海濱，即係JJ演唱會嘅位置。事後，更加有傳Ian因為咁而取消追蹤（Unfollow）咗JJ嘅社交平台，不過係咪真係咁就只有當事人先知。

稍早，演唱會香港區監製李志倫就發文澄清同公開道歉：「本人作為JJ20 世界巡迴演唱會香港站監製、同時也是JJ與MIRROR雙方就表演安排之溝通橋樑。因錯誤傳遞雙方訊息、導致表演形式上出現嚴重落差，最後在雙方一致決定下，取消了此嘉賓環節。本人就有關錯誤安排向JJ、Ian、MIRROR、主辦單位和所有觀眾致上最大歉意。希望大家原諒。」

之後，MIRROR經理人花姐亦都向傳媒表示：「JJ演唱會製作單位已就溝通和安排上的錯誤向我們表達歉意，MIRROR團隊衷心祝福JJ餘下香港個唱繼續演出成功，更期待未來有機會可與JJ在音樂上多方位合作。」