曾被傳身家過億 JW王灝兒男友葉韋彤 連同父母被申請破產

尋日有財經新聞報導，經營美妝連鎖零售業務嘅卓悅控股（00653），創辦人兼前大股東葉俊亨、其太太鍾佩雲及兒子葉韋彤（Tarzan），被一間財資管理服務公司入稟高等法院提出破產呈請，案件將排期今年11月8日提訊。而曾經被傳家族生意市值過億嘅Tarzan，正正係女歌手JW王灝兒男友。

今年32歲嘅JW，同Tarzan拍拖5年，多次傳過婚訊。據知JW亦相當能夠同Tarzan家人及朋友打成一片，又陪過「未來奶奶」入馬場。而Tarzan亦相當細心照料女友，JW開show前經常陪伴在側，又會同JW打網球。JW不時喺IG放閃，希望今次官司唔會影響佢地感情啦。

根據過去報導，Tarzan父母近年涉及唔同嘅金錢糾紛官司，其中Tarzan爸爸葉俊亨去年入稟要求取消一份股份回購協議，但今年7月被裁定敗訴，要連本帶利支付超過3億3千萬元。而今次入稟申請破產的公司，在法庭文件提及曾在前年10月向葉氏一家三口提供5,450萬元貸款，為期1年。

多間傳媒報導呢件事時，以「卓悅太子爺」介紹Tarzan，卓悅控股因此發聲明指葉俊亨夫婦已將手上股份出售，葉氏一家嘅官司同集團無關，因此提醒傳媒唔好再以「卓悅太子爺」等字眼介紹葉家成員，以免混淆。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！