雅虎香港新聞 專訪｜主理 RubberBand 視覺設計 出品陳柏宇「香港」外套 Kenji Wong：真誠是創作靈魂
【Yahoo 新聞報道】年輪事務所創辦人Kenji Wong鮮有在幕前出現，其作品卻經常搶佔大眾眼球。由10多年前風靡一時的黃藍大字歌詞廣告板，樂隊RubberBand的logo以至周邊商品，到近日陳柏宇登上《THE FIRST TAKE》時所穿的「香港」繡字外套，均出自Kenji手筆。縱橫品牌設計和音樂企劃20年，他接受《Yahoo新聞》專訪時強調，「真誠」是作品的靈魂，並寄語港人不應只一面倒支持偶像，需擴闊眼界吸收舊有和外來文化，才能讓本土文化走得更壯更遠。
文字記者：盧珮瑤
攝影記者：Oscar Liu
Kenji曾以25歲之齡登上「she.com」美術總監一職，2012年開設創作公司「年輪事務所」（GrowthRing & Co.），負責不同品牌設計及歌手專輯企劃、MV拍攝、演唱會及產品設計等。他與RubberBand合作長達逾10年，由樂隊logo、專輯設計、演唱會宣傳和商品，均由Kenji團隊製作。他亦創立自家服裝品牌「GrowthRing & Supply」，將本土特色融入衣著。雅虎香港早前邀請 Kenji 出席分享會，大談不同企劃的創作理念。
「聽廣東歌應該由廣東歌詞開始」
2011年，城市每個角落湧現大批黃、藍色大字報廣告，當中印有一句句港人熟悉的歌詞，正是Kenji其中一個標誌性作品 — 音樂串流平台Soliton Music的廣告，「聽廣東歌應該由廣東歌詞開始，當時想啲歌詞達到有畫面」，期望喚起觀眾回憶：「我嗰個年代做緊啲咩」。Kenji團隊在創作過程中，冀將歌詞與香港不同地方扣連，如在的士車身出現太極《紅色跑車》歌詞、在黃金廣場外懸掛陳奕迅《黃金時代》中的「黃金廣場外分手，在時代門外再聚」，「每一首歌都會有記憶，你同邊個聽、喺邊度聽都係記憶」。
「歌詞同地方有關，由地方生產到記憶，有記憶就有故事」。十多年後，廣東歌仍在記錄香港，《係咁先啦》、《Ciao》、《勿念》說的統統是離愁別緒，「（廣東歌）多咗同社會溝通，但我覺得唔應該再講」，Kenji認為港人是時候走出離愁，想像未來，「離別後新生活要面對啲咩？例如（陳柏宇）《有天》入面所講，就係離開之後嘅天空會係啲咩」。
受是枝裕和啟發
Kenji的出品以寫實細膩和懷舊見稱，包括方皓玟《HW1》MV講述九十年代愛情故事，抓緊港人情懷；Per se《在生》MV記錄小情侶臨終前愛個夠。Kenji愛好日本文化，情感表達委婉而隱晦，「擺落MV呢啲浪漫變咗啲好實在嘅嘢，阿媽煮餐飯畀你食，可能係走（移民）之前最後一餐飯，你望住佢洗碗，個心會罨住」。
娓娓道來的溫婉，源於Kenji深受日本著名導演是枝裕和啟發，「質感好似飲緊一杯好淡嘅綠茶，但飲完之後有回甘，諗返故事個心一路會罨住」。不過，他謝絕以任何形容詞規限自己，「王家衛係inspired by（靈感來於）法國新浪潮，但好少會話佢係『法國風』，會話『好香港、好王家衛』，好期望做到自己一種獨有嘅美學」。
真誠才是最大本領
創作要動人，Kenji強調「Honesty」（真誠）是不二法門。他為陳柏宇籌備新專輯時，讓陳在製作特輯分享兒時經歷和唱歌初衷，「兩個人都係以往搵好多嘢去遮住自己，40歲人攤返自己出嚟畀人睇，『其實我係咁㗎』」。
在自家品牌中，Kenji設計的服裝同樣蘊含他的故事。「GrowthRing & Supply」皇牌衛衣前面刺上大字「九龍」，背面則寫上「G.R.S Boundless from Kowloon to Tokyo」。Kenji自小在九龍城長大，創立服裝品牌後與東京不同服裝品牌合作，「想講嘅係我由九龍出發，希望未來以自己地去文化去同唔同地方嘅人合作，而東京係一個開始」。從MV到時裝設計，Kenji 創作思路一脈相承，「諗個故事、想用咩手法同風格去呈現，其實擺落套衫都係一樣，只係platform（平台）唔同」。
唯盼在作品保留真誠，全因Kenji發現自從社交網站出現，大眾慢慢失去說真話的勇氣，「我哋每次講一樣嘢，都會驚人哋點諗、點寫，咁樣會唔會有（公關）災難」。他以商台DJ梁文禮批評歌手的風波為例，「可能佢個人及表現手法上有問題，但我覺得有權良性評論，尤其以專業人士身份，大家都可以講好唔好睇，但畀人攻擊到體無完膚；個問題係邊個踢爆，呢個係道德嘅嘢嚟，但大家都唔記得咗呢個道德」。
嘆香港樂迷光譜收窄
十多年前，Soliton黃藍廣告板的歌詞引港人共鳴；時而勢易，黃藍已被視為兩種極端。Kenji坦言現時社會的一面倒令香港樂迷光譜越收越窄，「我覺得喜歡新一代歌手嘅人都可以多啲聽多啲上幾代歌手，好多曾經都有多好歌，紅過、值得留喺度嘅，但因種種原因消失咗。如果可以將一二三四刷嘅消費主意或時間，多啲support（支持）下其他，會令行業發展更加廣闊」。
Kenji認為，樂迷應回歸審視作品質素，「我好鍾意盧冠廷啲黑膠，其實佢咩政見對我係無影響。如果呢個價值觀成立，所有去過大陸發展嘅歌手，只要佢作品內容係好，都唔應該排斥佢」。眼界決定境界，香港樂迷需與樂壇一起進步，「你要開放自己吸收其他嘢，上一輩值得去睇嘅、外來嘢都閱讀下，唔係要支持香港就唔睇得日本戲，要研究大家點樣可以進步」。
