Mandy Lieu近照曝光笑容滿面 與周焯華昔日愛巢再次曝光 全屋極多巨形鏡增情趣？

Mandy Lieu與太陽城集團前主席、綽號「洗米華」嘅周焯華於2019年分手，二人育有3名女兒及一名兒子。縱然已分開，但Mandy Lieu有情有義，將名下市值1.2億元嘅西半山豪宅珒然高層單位抵押作借貸擔保，為周焯華公司還債。去年已有地產經紀拍片介紹二人嘅半山豪宅，不過一直未成功賣出；近日，又有地產經紀拍片介紹豪宅內部，令昔日愛巢再次曝光。

豪宅面積超過2000平方呎，設有私人升降機大堂，飽覽無敵維港煙花海景，近乎全屋採用落地玻璃，又有多面鏡子，空間感十足，就連地產經紀亦指從未見過一間屋咁多鏡，表示：「有錢人品味果然唔同啲」。從影片所見，屋內音響及家電都係名牌貨，備有價值50萬嘅B&O音響。飯廳非常大，放到長型梳化及大餐枱，仲有個內藏鋼琴嘅入牆櫃；廚房則分為西廚和中廚區，客廁則配有雲石桑拿房。

主人房方面，設有King Size大床，地產經紀更坐上床上介紹印有Mandy「M」和周焯華Alvin「A」英名字母咕𠱸；King Size大床上面嘅天花有塊巨形鏡，床尾對住嘅電視櫃亦為鏡面，床邊有個大浴缸及套廁。睡房另一邊亦擺有一張紅色大梳化，大梳化嘅天花都有塊巨形鏡，奢華又具情趣。

Mandy Lieu於周焯華分手嗰陣，盛傳獲3億分手費，並有指佢將分手費用來開設餐廳及豪擲兩億買入370多萬平方米嘅農地打造高品質有機食品為主嘅農場。現時，Mandy Lieu主力發展莊園業務，又為網上雜誌擔任專欄作家，分享環保及可持續發展概念，又不時出席講座大談環境保育。莊園前日（23日）嘅帖文，亦見到Mandy Lieu出現；從Mandy Lieu與一班學生嘅合照見到，身穿運動裝打扮嘅Mandy Lieu笑容滿面，狀態極佳。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！