Market Insight:逼近阻力港股勢波動

東方日報
東方日報 OrientalDaily
港股已連升多日,且升近阻力位,後市料反覆。
港股已連升多日,且升近阻力位,後市料反覆。

升開就升,一八年港股開個好頭,趁住隔晚美股做好,港股再下一城,儘管中段一度腳軟,臨收市前又拗腰完成連升七個交易日的記錄,升45點收報30,560點,再創逾十年收市新高。

恒指逼近月線圖的長期通道上阻力30,750點,相信短期後市反覆難免。今年一開波,古勝講明要將工商銀行(01398)同建設銀行(00939)視作上半年倉底組合的鐵膽,如果大家嫌跨年期間內銀股升得太多,不妨考慮分段買入,避免一炮過高追,承受短期波動的風險。

事實上,港股平均市盈率不過13.3倍左右(內銀更低),距離港股歷史超過20倍需要留神的警戒線,仲有一段距離。即使今年未必重演一七年由頭升到尾的壯舉,不過估值大落後而基本因素逐步改善的內銀股跑出機會唔細,有閒錢唔怕分段吸嚟坐。

騰訊走向 快有分曉

尋日升市,騰訊(00700)都唔失禮,即市升過9蚊見426.8元,一度破舊年十一月二十九日高位422.8元。若非善忘,當日見完呢口價,為騰訊牛證大屠殺揭開序幕,股王五日被推低半百有凸,落到365.2元。

如果騰訊股價真係返到當日呢個阻力位,中短期調整結束可以確認,當然有條件再挑戰上次高位439.6元。但如果未來幾日又再縮番落嚟,咁騰訊捧場客就要執生喇。

油價急升或非好事

過去幾個交易日,始終個市累積升幅唔少,部分強勢股抖氣亦屬正常,最明顯係中國平安保險(02318),尋日見一個半月高位85.85元之後,倒跌1.4%散場,報83.8元。炒內銀的資金亦由重磅一線股,擴散到二線之選,好似招商銀行(03968)升1.8%,農業銀行(01288)升1%。

想唔話港股A股化都唔得,尋日大媽熱炒雄安概念,香港呢邊廂亦趁機將幾隻水泥股落鑊,佔地利的金隅股份(02009)升8.4%,華潤水泥(01313)及中國建材(03323)分別升4.4%及升3.6%,兩股齊創今浪新高。

國際油價矮仔上樓梯,前晚觸及60美元一桶關口,全球最大私募基金黑石的Byron Wien預測,油價今年會見80美元。「三桶油」中,原油價格敏感度最高的中海油(00883)衝上11.62元的近兩年半高位收市。萬一油價年內真係升超過三成,古勝無諗石油股可以叻到去邊,反而通脹到時會飆到去乜位,美國聯儲局又振振有詞加多幾次息,諗起都驚驚地。

H股全流通要識炒

上周中證監公布H股全流通試點計劃,並預告初時會揀三間公司作為試點,個個都估緊百幾間未全流通H股企業之中,邊間最先走出嚟做示範,大行同散戶都樂此不疲玩「估字花」遊戲。H股未流通股份涉及2.6萬億左右,約係港股總市值8至9%,話多唔多,話少唔少。

古勝首先諗到香港交易所(00388),正如尋日所講,港交所必然是既得利益者,賭枱上過手籌碼多咗,開賭的抽佣都抽多啲。但基於測試漸進式推行,初頭效果未必好明顯,短期就消息股價衝完一浸,恐怕短期炒消息水位唔多。

古勝認為股民其實更應着眼全流通之後,長年受非流通股份問題、管理層激勵不足的問題,估值長期折讓的H股有機會獲重估,當然這個變化可能會以年計。如果份MPF可以買國指ETF就最好,如果看官有做開月供股票,不妨諗吓。

古勝































其他內容